Kómek «Eńbek» memlekettik baǵdarlamasy aıasynda kórsetilgen.
2021 jyly Almaty qalasynyń halyqtyń osal toptaryn áleýmettik qoldaýǵa 30 mıllıardtan astam teńge bólindi, onyń 14 mıllıard teńgesi jumsaldy. Bul málimetterdi Almaty qalalyq áleýmettik ál-aýqat basqarmasynyń basshysy Nazıra Toǵyzbaeva Óńirlik komýnıkasıalar qyzmetiniń baspasóz konferensıasy barysynda aıtty, dep habarlaıdy Almaty-akshamy.kz.
Nazıra Toǵyzbaevanyń aıtýynsha, jyl basynan beri 132 myń almatylyq áleýmettik qoldaý alǵan. Ol kómek «Eńbek» memlekettik baǵdarlamasy aıasynda kórsetilip jatqanyn, az qamtylǵan azamattarǵa, múgedekterge qoldaý kórsetiletinin eske saldy. Sonymen qatar, áleýmettik jobalar iske asyrylýda jáne eńbek qatynastary salasynda memlekettik baqylaý júrgizilýde.
Almaty qalalyq áleýmettik ál-aýqat basqarmasynyń basshysy «Eńbek» baǵdarlamasy aıasynda jyl sońyna deıin 13,8 mlrd bólindi. Bul qarajat 24 myńnan astam adamǵa jetýge kómektesedi.
«Aǵymdaǵy jyldyń 7 aıynda jumyspen qamtý ortalyǵyna 27 myń adam júgingen. 19 700 adam jumyspen qamtýdy qamtamasyz etý boıynsha belsendi sharalarǵa tartyldy, 17 900 adam jumysqa ornalastyryldy», - dedi Nazıra Toǵyzbaeva.
Turaqty jumyspen qamtylǵandardyń ishinde megapolıstiń 8 700 turǵyny bar, taǵy 9 200 adam ýaqytsha jumyspen qamtyldy, 1 100 adam qazir áleýmettik jumys oryndarynda jumys isteıdi, 1 500 úmitker jastar praktıkasyna jiberildi. Bilim berý uıymdarynyń taǵy 800 túlegin jumysqa ornalastyrý josparlanýda. 6 600 adam qoǵamdyq jumystarǵa jiberildi.
Nazıra Toǵyzbaeva qala turǵyndaryna jańa mamandyqtardy úıretý týraly da aıtty.
«Qysqa merzimdi kýrstar biliktiligin joǵaltqan nemese mamandyǵyn ózgertkisi keletinderge arnalǵan. Almatynyń 34 oqý ornynda 41 mamandyq boıynsha 1 myńnan astam adam oqıdy», - dedi vedomstvo basshysy.
Sózin jalǵastyrǵan ol eńbek naryǵynda jas túlekterdiń básekege qabilettilik deńgeıi tómen ekenin atap ótti. Sondyqtan qalada jastarǵa qajetti jumys daǵdylaryn alýǵa jáne jumysqa beıimdelýge kómektesýge baǵyttalǵan Birinshi jumys jobasy iske qosyldy. Joba aıasynda jumysqa ornalasý josparlanǵan 212 adamnyń 116-sy jumyspen qamtylǵan.
Aıta keterligi, qala turǵyndary men ótinish berýshiler jumysqa ornalasý úshin Almaty qalasynyń jumyspen qamtý ortalyǵyna habarlasa alady, sondaı-aq enbek.kz elektrondy eńbek bırjasy portalyndaǵy bos oryndar tizimimen tanysa alady.
Baspasóz konferensıasynyń sońynda Nazıra Toǵyzbaeva osy jyly 757 almatylyq 200 aılyq eseptik kórsetkish kóleminde grantqa ıe bolǵanyn, ıaǵnı óz bıznesin júzege asyrýǵa 583 myń teńge alǵanyn qosty. Kásipker bolǵysy keletinder negizinen tigin, aspazdyq, manıkúr, shashtaraz jáne basqa da qyzmetter boıynsha jeke isterin asha alady.