Osy máselemen shuǵyldanatyn mamandardyń otyrysy ótti.
Qazaqstan úkimetiniń músheleri Adam saýdasyna qarsy kúres jumystary qalaı júrgizilip jatqanyn baıandady. Osy maqsatta beınekonferensıa rejıminde adamdardy zańsyz áketýge, ákelýge jáne satýǵa qarsy kúres máseleleri jónindegi vedomstvoaralyq komısıanyń 41 otyrysy ótti, dep habarlaıdy Almaty-akshamy.kz.
«Keńeske Joǵarǵy Sot, Bas prokýratýra, Ulttyq qaýipsizdik komıteti, QR Qarjy monıtorıńi agenttigi, 8 mınıstrlik, QR Prezıdenti janyndaǵy Adam quqyqtary jónindegi komısıa, Adam quqyqtary jónindegi ulttyq ortalyq, jergilikti atqarýshy organdar men ÚEU ókilderi qatysty», – delingen Eńbekmın baspasóz qyzmetiniń habarlamasynda.
Qazaqstan úkimetiniń Adam saýdasyna baılanysty qylmystardyń aldyn alý, boldyrmaý jáne olarǵa qarsy kúres jónindegi 2021 – 2023 jyldarǵa arnalǵan is-sharalar josparynyń oryndalý barysy týraly otyrysqa qatysýshylardy Eńbekmıni áleýmettik qyzmetter saıasatyn damytý departamentiniń dırektory Albına Boranbaıqyzy habardar etken.
«Aǵymdaǵy jylǵy 26 mamyrda ótken VAK-tyń 40-otyrysynyń qorytyndysy boıynsha adam saýdasyna qarsy is-qımyl salasyndaǵy normatıvtik quqyqtyq aktilerdi jetildirý sheńberinde QR Áleýmettik kodeksiniń tujyrymdamasyna Qazaqstan aýmaǵynda ýaqytsha bolatyn sheteldik adam saýdasynyń qurbandaryna arnaýly áleýmettik qyzmetter kórsetýdi qarastyratyn norma engizildi. Qazirgi ýaqytta bul norma memlekettik organdarmen kelisýden ótýde», – dedi Albına Boranbaıqyzy.
Mamandardyń aıtýynsha, naýryz jáne maýsym aılarynda ishki ister organdary respýblıka aýmaǵynda «STOP trafık» jedel-aldyn alý is-sharalaryn júrgizdi. Olardyń qorytyndysy boıynsha İİM aýmaqtyq bólimsheleri Qylmystyq kodekstiń túrli baptary boıynsha 87 sotqa deıingi tergeýdi bastady (qanaý maqsatynda adam urlaý, qanaý maqsatynda bas bostandyǵynan zańsyz aıyrý, kámeletke tolmaǵandy jezókshelikpen aınalysýǵa tartý, kámeletke tolmaǵandardy saýdaǵa salý, jezókshelikpen aınalysýǵa tartý, jezókshelikpen aınalysýǵa arnalǵan prıtondar uıymdastyrý nemese ustaý jáne jeńgetaılyq).
Sonymen qatar mamandar, Qazaqstan aýmaǵynda ýaqytsha turatyn sheteldikterge jáne adam saýdasynyń qurbany bolǵan azamattyǵy joq adamdarǵa arnaýly áleýmettik qyzmetter (Budan ári – AÁQ) kórsetý bóliginde qoldanystaǵy zańnamaǵa ózgerister men tolyqtyrýlar engizý máselelerin qaraǵan.
Bul tolyqtyrýlar boıynsha, sheteldik azamattarǵa QR azamattarymen teń dárejede tegin medısınalyq kómek beriledi, olarǵa quqyqtyq konsýltasıa beriledi jáne de basqa da kómek beriledi.
«Bul normalar sheteldik adam saýdasynyń qurbandaryna kórsetiletin kómek kólemine teń dárejede qol jetkizýge múmkindik beredi, olardyń tergeý men qylmystyq qýdalaýǵa tartylýyna qaramastan, áleýmettik kómek kórsetýdi qamtamasyz etýge múmkindik beredi», – dep atap ótti Eńbekmıni Áleýmettik qyzmetter saıasatyn damytý departamentiniń dırektory.