QR eńbek sińirgen ǵylym qaıratkeri, kórnekti akademık-gıdrogeolog jáne Uly Otan soǵysynyń ardageri Júrimbek Sydyqovtyń qurmetine Nazarbaev dańǵyly, 172 mekenjaıda memorıaldy taqtanyń saltanatty ashylý rásimi ótti, dep habarlaıdy Almaty-akshamy.kz.
İs-sharaǵa otbasy músheleri, Almaty qalasy mádenıet basqarmasynyń ókilderi, QR UǴA akademıkteri, Ý.M. Ahmedsafın atyndaǵy gıdrogeologıa jáne geoekologıa ınstıtýtynyń jetekshi ǵylymı qyzmetkerleri qatysty.
Júrimbek Sydyqov - akademık, Qazaq KSR eńbek sińirgen ǵylym qaıratkeri, Qazaqstan Respýblıkasy Ulttyq Ǵylym akademıasynyń úlken altyn medaliniń, Q.Sátbaev atyndaǵy syılyqtyń, birinshi dárejeli Otan soǵysy ordeniniń ıegeri.
Ǵalym Oral-Muǵaljar taýlary men Muǵaljar jazyǵynyń jer asty sýlaryn kóp jyldyq zertteý boıynsha irgeli monografıa jazdy. Túrli merzimdi basylymdarda gıdrogeologıa boıynsha barlyǵy 35 monografıa, 720 eńbek jarıalaǵan.