Almaty qalalyq Kardıologıa ortalyǵynda MÁMS jáne TMKKK aıasynda júrekke joǵary tehnologıalyq shaǵyn ınvazıvti otalar jasalatyn TAVI ortalyǵy ashyldy. Ortalyqta naýqastar eń qajetti – júrektiń últradybystyq zertteýinen óte alady. Munda joǵary deńgeıde dıagnostıkalyq beıneleýge múmkindik beretin 128 tilimnen turatyn zamanaýı KT apparaty bar.
Odan keıin kórsetkishter boıynsha pasıentterge hırýrgıalyq aralasý – TAVI otasy (transcatheter aortic valve implantation) jasalady. Bul – qolqa qaqpaqshasynyń stenozyn emdeýdiń zamanaýı ádisi. Munda tarylǵan klapan júrekke ashyq operasıa jasamaı-aq tamyr arqyly aýystyrylady. Otanyń bul túri narkozsyz ótip, naýqasty az jaraqattanatyny sózsiz. Dástúrli hırýrgıamen salystyrǵanda naýqas qalpyna tez keledi jáne onyń aýrýhanada jatý merzimi qysqarady.
Endi júrekke ashyq ota jasaýǵa qarsy kórsetilimi bar aýyr naýqastarǵa operasıa jasaýdyń biregeı múmkindigi bar. Mundaı ota 70 jastan asqan júrek aýrýy bar naýqastarǵa kórsetilgen.
TAVI ortalyǵynyń ashylýy aıasynda qalalyq Kardıologıalyq ortalyqtyń qyzmetkerlerine «sheberlik sabaǵyn» ótkizý úshin Fraıbýrgten (Germanıa) endovaskýlárlyq hırýrgıa dırektory Frans-Iozef Neıman arnaıy shaqyryldy
Qazir Almaty qalasynda jylyna 20-22 ota jasalsa, muqtaj naýqastardyń qajettiligi jylyna 200-250 otaǵa deıin jetedi.
Mundaı otany júzege asyrý úshin ortalyqta UǴKO, Germanıa jáne Túrkıa klınıkalarynyń jetekshi mamandarynan bilim alǵan qyzmetkerler bar.
«Qolqa qaqpaqshasynyń stenozy júrekten denege qannyń qalypty ótýine kedergi keltiretin sańylaýdyń qatty tarylýymen sıpattalady. TAVI prosedýrasy sandaǵy arterıa arqyly engiziletin kateter arqyly júzege asyrylady. Kateter jańa klapandy qalaǵan jerge jetkizip, onda ol tarylǵan klapandy ashady jáne aýystyrady. Bul proses narkozsyz jasalady jáne júrekke ashyq ota jasaýdy qajet etpeıdi de, qan aǵymyn qalpyna keltirýge múmkindik beredi. Al munyń barlyǵy bir jerde shoǵyrlanýy naýqastyń problemasyn tez sheshýge jol ashady», – deıdi qalalyq Kardıologıalyq ortalyqtyń rentgen hırýrgıasy bóliminiń meńgerýshisi Orazbek Sahov.
TAVI ortalyǵy Almaty qalasy Qoǵamdyq densaýlyq saqtaý basqarmasynyń tapsyrysymen jáne qoldaýymen júrek-qan tamyrlary aýrýlaryn emdeýge degen kózqarasty ózgertý jáne pasıentterimizdiń ómir súrý sapasyn jaqsartý maqsatynda qurylǵan.
«Almaty – elimizdegi eń iri megapolıs. Mundaǵy TAVI hırýrgıasyna qajettilik ómir súrý uzaqtyǵynyń ulǵaıýymen jáne dıagnostıkanyń jaqsarýymen birge artyp keledi. TAVI ádisin qoldaný jáne TAVI ortalyǵynyń ashylýy densaýlyq saqtaý júıesi men pasıentter úshin birneshe mańyzdy artyqshylyqqa ıe: dástúrli ota tym qaýipti egde jastaǵy pasıentter úshin qoljetimdiligi; otadan keıin qalpyna tezirek kelýi; asqyný yqtımaldyǵynyń az bolýy; TAVI otasy aorta qaqpaqshasy stenozynyń aýyr túrimen aýyratyn naýqastardyń ómir sapasyn aıtarlyqtaı jaqsartady jáne kardıohırýrgıa salasyndaǵy odan ári ilgerileý úshin mańyzdy bolyp tabylatyn medısınalyq zertteýlerdi damytýǵa, arnaıy mamandardy daıyndaýǵa óz úlesin qosady», – deıdi qalalyq Kardıologıa ortalyǵynyń dırektory, medısına ǵylymdarynyń doktory, profesor Roza Qýanyshbekova.