Astanalyq turǵynnan 33 mln teńgege jýyq qarjyny qorqytyp alǵan kúdiktiler quryqtaldy
31 jáne 46 jastaǵy eki er adam birneshe jyl boıy astanalyqtan aqshany qorqytyp alǵan. Olar psıhologıalyq qysym kórsetý arqyly, ıntımdik sıpattaǵy fotosýretter men beınejazbalardy taratamyz dep qorqytyp, 2019 jyldan bastap er adamdy bopsalaǵan.
Birneshe jyl ishinde astanalyq azamat bopsalaýshylarǵa jalpy somasy 33 mln teńgege jýyq aqsha bergen.
Kúdiktilerdiń biriniń talabyn oryndaý úshin jábirlenýshi óziniń Toyota Land Cruiser Prado avtokóligin lombardqa tapsyryp, 10 mln teńge bergen. 46 jastaǵy kúdiktiniń kezekti bopsalaý faktisinen keıin er adam osy jyldyń qarasha aıynda polısıaǵa júgingen.
Jedel-izdestirý is-sharalary barysynda uıymdasqan qylmysqa qarsy kúres basqarmasynyń qyzmetkerleri bopsalaýǵa qatysy bar eki er adamdy ustady jáne qamaýǵa aldy.
Kúdiktilerdiń biri Almaty qalasynda ustaldy. Jeke tekserý barysynda odan esirtki zaty oralǵan túıinshek tárkilendi. Ustalǵan adamnyń buryn osyǵan uqsas qylmys jasaǵany úshin sottalǵany anyqtaldy.
Qazirgi ýaqytta atalǵan fakti boıynsha QR QK-niń 194-baby (Qorqytyp alý) boıynsha sotqa deıingi tergeý amaldary júrgizilip jatyr.
Astana qalasynyń polısıa departamenti zańnamaǵa sáıkes iri jáne asa iri mólsherde múlik alý maqsatynda jasalǵan qorqytyp alý 5 jyldan 15 jylǵa deıingi merzimge bas bostandyǵynan aıyrýǵa jazalanatynyn eskertedi.