Almaty ákimi Erbolat Dosaev Almaly aýdanynyń turǵyndarymen kezekti kezdesý ótkizdi. Ákimdiktiń baspasóz qyzmeti ótken kezdesý barysynda megapolıs basshysynyń bergen tapsyrmalary týraly aıtyp berdi, dep habarlaıdy almaty-akshamy.kz
Ótken jyldyń tamyz aıynda ótken kezdesýde aýdan turǵyndary gúlzarlar men saıabaq aımaqtaryndaǵy jasyl jelekterge kútim jasaý, atap aıtqanda ýaqtyly sýarý máselesin kótergen edi. Nátıjesinde «Gandı», «Bıokombınat», «Sosnovyı», «Kishi Gandı» saıabaqtarynda jáne A.Imanov atyndaǵy saıabaqta avtomattandyrylǵan sýarý júıesi ornatyldy.
Sonymen qatar, Baıtursynov – Tóle bı – Naýryzbaı batyr – Bógenbaı batyr kósheleriniń boıyndaǵy turǵyndar ınjenerlik jelilerdiń jıi buzylatynyna shaǵymdanǵan bolatyn. Osyǵan baılanysty qalalyq qyzmetter uzyndyǵy 3,6 km jáne 0,3 km jylý jelileri bar 6 ýchaskede sý qubyryn rekonstrýksıalady.
Sondaı-aq, qala turǵyndarynyń ótinishi boıynsha Tóle bı kóshesiniń boıymen Chokın kóshesinen Baızaqov kóshesine deıin jáne Raıymbek dańǵylynyń boıymen Mehanıka kóshesinen Áýezov kóshesine deıin jalpy uzyndyǵy 1 km trotýar salyndy. Qyrkúıek aıynda Panfılov kóshesiniń Qabanbaı batyr kóshesinen Gogol kóshesine deıingi ýchaskesinde tas tóseldi.
Baıseıitov kóshesi men Seıfýllın dańǵylynyń boıyndaǵy úılerdiń turǵyndary aýlalardy uzaq jóndeýge qatysty shaǵymdanǵan bolatyn. Nátıjesinde, qala ákiminiń tapsyrmasy boıynsha qazan aıynda 9 kúrdeli jóndeý jáne 50 aýlaǵa aǵymdaǵy jóndeý jumystary júrgizildi. Jumys aıasynda balalar alańdary, trenajerler ornatylyp, jaryqtandyrý jańartyldy. Sondaı-aq, Gogol kóshesi men Abylaı han dańǵylyndaǵy 20 úıdiń qasbetterine jóndeý jumystary júrgizildi.
Kezdesý qorytyndysy boıynsha aýdannyń 8 ýchaskesinde sý basýdyń aldyn alý maqsatynda uzyndyǵy 2,7 km aryq jelisi rekonstrýksıalandy.
Aýdan turǵyndary úılerdi jáne áleýmettik nysandardy úzdiksiz elektrmen jabdyqtaý máselesine alańdaǵan bolatyn. Osyǵan qatysty Erbolat Dosaevtyń tapsyrmasy boıynsha 4 qosalqy stansıa rekonstrýksıalanyp, 8,5 km elektr jelilerine jospardan tys jóndeý júrgizildi.
Sondaı-aq, Áıteke bı kóshesindegi Baıtursynov pen Dosmuhamedov kósheleriniń arasyn uzartý jumysy aıaqtaldy jáne aǵymdaǵy jóndeýmen 29 myń m2 qamtyldy.