Almatyda alǵash ret júrektiń ótkizgish júıesin stımýlásıalaý boıynsha operasıa jasaldy
Kardıologıa jáne ishki aýrýlar ǴZI-da Taraz, Qaraǵandy, Almaty qalalarynyń jáne basqa óńirlerdiń dárigerleri úshin arıtmologıa salasyndaǵy halyqaralyq deńgeıde moıyndalǵan maman, Polsha, Vroslav medısınalyq ýnıversıtetiniń profesory Iasek Gaektiń qatysýymen oqytý sheberlik synyby ótti. Sheberlik synyp barysynda tolyq atrıoventrıkýlárlyq blokadasy bar, ıaǵnı júrek yrǵaǵynyń buzylýyna ákeletin kardıopatologıasy bar 5 pasıentke operasıa jasaldy. Eń úlken pasıent 66 jasta, al eń jas pasıent bar-joǵy 23 jasta.
Máselen, tolyq AV blokadasy, Gıs býdasy oń aıaǵynyń tolyq blokadasy dıagnozy qoıylǵan 58 jastaǵy naýqasta álsizdik, bas aınalý, entigý, qan qysymynyń joǵarylaýy, jıi bas aýrýy sıaqty belgileri boldy. Týa bitken júrek aqaýy bar Gıs býdasynyń sol jáne oń jaq aıaqtarynyń tolyq blokadasyna shaldyqqan 23 jastaǵy naýqasty da únemi bastyń aınalýy, entigý jáne tez sharshaý sıaqty belgiler mazalaǵan.
AV blokadasynyń asqynǵan aǵymy kenetten júrek ólimine ákelýi múmkin ekendigin atap ótken jón.
«Biz jańa tehnologıalardy engizý arqyly zamanaýı medısınalyq úrdister men standarttardy ustanýǵa tyrysamyz. Mamandarymyzdy jaqyn jáne alys shet elderdegi túrli sheberlik sabaqtaryna jibere otyryp oqytamyz, úzdik dárigerlerimiz óz áriptesterin bizdiń ınstıtýtta jáne óńirlerge baryp oqytady. Demonstrasıalyq operasıalaryn júrgizýmen tájirıbe almasý mamandarǵa kásibı qyzmette qajetti bilimderi men daǵdylaryn jetildirýge múmkindik beredi», - deıdi Kardıologıa jáne ishki aýrýlar ǴZI Basqarma tóraǵasy Marat Pashımov.
Polshadan kelgen profesor Iasek Gıek atap ótkendeı, Gıs býdasyn stımýlásıalaý boıynsha operasıa júrek jetkiliksizdigi bar naýqastar úshin tıimdi. Dárigerdiń mundaı operasıalardy jasaýda úlken tájirıbesi bar.
«Men Qazaqstanǵa operasıaǵa shaqyrtý alǵanyma óte rızamyn. Bul meniń 2-shi saparym, jáne meniń tájirıbem men qosymsha oqytý Qazaqstandyq dárigerlerge osy tehnıkany engizýge kómektesedi dep senemin. Bul ádis júrek jetkiliksizdigi bar naýqastar úshin óte tıimdi. Aralasýdan keıin pasıent qosymsha dári - dármek terapıasyn qajet etetin ilespe patologıa bolmaǵan jaǵdaıda kelesi kúni aýrýhanadan shyǵaryla berse bolady», - deıdi profesor.
Júrek yrǵaǵy men ótkizgishtiginiń buzylýy bólimshesiniń meńgerýshisi Baǵdat Ahyttyń aıtýynsha, ótkizgish júıe boıynsha yntalandyrý qarynshaaralyq dıssınhronıa máselelerin sheshýge, júrektiń eki qarynshasyn da dálirek jáne sınhrondy túrde belsendirýge múmkindik beredi, bul pasıentterdiń ómir súrý sapasyn jaqsartady. Bul ádis ádettegi oń qarynshalyq yntalandyrýǵa qaraǵanda áldeqaıda tıimdirek.
«Júrektiń ótkizgish júıesine yntalandyrýshy elektrodtardy ımplantasıalaý pasıentke júrek jetkiliksizdiginiń damýyn boldyrmaýǵa múmkindik beredi. Operasıa kezinde táýekelder az, óıtkeni biz joǵary tehnologıalyq jabdyqty qoldanamyz, ár pasıent úshin shyǵyn materıaldarynyń úlken spektrin jeke tańdaımyz», - dedi KjİAǴZI arıtmologıalyq qyzmetiniń aǵa ordınatory Artýr Abdymomýnov.
Ol kardıostımýlátor táýlik boıy jumys isteıtinin, júrekti yntalandyratynyn jáne júrek soǵý jıiligi shekti deńgeıden tómendegen kezde qajettilik boıynsha qosylatynyn atap ótti. Bul júrektiń qalypty jumysyna múmkindiginshe jaqyn fızıologıalyq yntalandyrýǵa múmkindik beredi. 12-13 jyldan keıin pasıentke qurylǵyny aýystyrý qajet bolýy múmkin, biraq osy ýaqyt ishinde adam óziniń ádettegi ómir saltyna oralyp, tipti óziniń rejımine sporttyq júktemelerdi qosyp, eshqandaı shekteýsiz ómir súre alady.
Aıta ketsek, operasıa MÁMS sheńberinde júrgizildi, barlyq kómek qor qarajaty esebinen kórsetiledi jáne pasıentter úshin tegin.