Eksport 98%-ǵa ósken
EAEO qurylǵannan bergi jyldary Qazaqstannyń basqa qatysýshy eldermen saýda aınalymy 74%-ǵa ósken, bul rette eksport 98%-ǵa artqan. Bul týraly Memleket basshysy Qasym-Jomart Toqaev Joǵary Eýrazıalyq ekonomıkalyq keńes otyrysynda aıtty, dep habarlaıdy Almaty-akshamy.kz QazAqparatqa silteme jasap.
Prezıdent geosaıası shıelenister búkil álemdegi ekonomıkalyq jaǵdaıǵa aıtarlyqtaı áser etip jatqanyn aıtty.
«Bıyl halyqaralyq qarjy ınstıtýttary álemdik ekonomıkanyń ósý boljamdaryn shamamen eki esege jýyq tómendetti. Alaıda, syrtqy faktorlardyń qysymyna qaramastan, bizdiń Eýrazıalyq ekonomıkalyq odaq sheńberindegi yntymaqtastyǵymyz oń serpin kórsetip otyr. Qatysýshy elder makroekonomıkalyq turaqtylyqty saqtaýda, ekonomıkalyq ósý qarqynyn jáne ózara saýda kólemin arttyryp jatyr. Óz tarapymnan EAEO qyzmeti jyldary Qazaqstannyń basqa qatysýshy eldermen saýda aınalymy 74%-ǵa óskenin, bul rette eksport 98%-ǵa óskenin atap ótemin. Biz muny jaqsy kórsetkish dep sanaımyz», - dedi Qasym-Jomart Toqaev.
Prezıdenttiń aıtýynsha, aýqymdy birlesken ınfraqurylymdyq jobalar iske asyrylýda, ónerkásiptik kooperasıa damyp, qyzmetterdiń ortaq naryǵy qalyptasyp, ózara esep aıyrysýda ulttyq valútalar úlesi artyp keledi.
«Bul rette qazirgi geoekonomıkalyq jaǵdaılarda odaqtyń áleýetin barynsha tolyq jáne tıimdi ashý – bizdiń ortaq basymdyǵymyz boldy. Ony qurǵan kezde qoıylǵan barlyq mindetterdi múmkindiginshe tolyq iske asyrýymyz kerek. Shynyn aıtqanda, alda kóp jumys bar. Eń aldymen, tórt erkindiktiń birinshisin – taýarlardyń erkin qozǵalysyn tolyqqandy júzege asyrý jóninde aıtyp otyrmyz. Bul biryńǵaı, esh kedergisiz naryqty qalyptastyrý jáne taýarlardyń úshinshi elderge erkin tranzıtin qamtamasyz etýdi bildiredi. Osy maqsattarǵa tolyq qol jetkizý úkimetter men Eýrazıalyq ekonomıkalyq komısıa jumysynyń negizgi baǵyty bolýǵa tıis dep sanaımyn», - dedi Memleket basshysy.