15 maýsymda alty jolaqty trassa boıynsha kólik qatynasy iske qosylady
Úlken Almaty aınalma jolynyń (ÚAAJ) 66 shaqyrymyn paıdalanýǵa berý shamamen 15 maýsymǵa josparlanǵan. Búgin, 25 mamyrda jergilikti bılik pen jol salǵan kompanıa iri avtomagıstralǵa jaqyn ornalasqan Talǵar aýdanynyń birneshe aýyly turǵyndarymen kezdesti, dep habarlaıdy Almaty-akshamy.kz.
Kezdesýge QR IIDM Avtomobıl joldary komıteti tóraǵasynyń orynbasary Baqtıar Jambyl, "ÚAAJ Investısıalar jáne operasıalar" JSHS joldy paıdalaný jáne ustaý jónindegi basshysy Nurlanbek Ómirbaev jáne Talǵar aýdanynyń ákimi Tańat Aıbarbekov qatysty.
Nurlanbek Ómirbaev 15 maýsymda alty jolaqty trassa boıynsha kólik qatynasy iske qosylatynyn atap ótti. 66 shaqyrymǵa biryńǵaı jyldamdyq rejımi ornatylady: 120 km/saǵ. avtomagıstral tolyǵymen aqyly bolady. Buǵan deıin bılik barlyq avtokólik ıeleri men tas jolǵa irgeles jatqan aýyldardyń turǵyndary úshin tarıf qandaı bolatynyn aıtqan bolatyn. Máselen, İle, Talǵar jáne Qarasaı aýdandarynyń turǵyndary úshin Almaty jáne basqa óńirlerdiń turǵyndaryna qaraǵanda jolaqysy birneshe ese az bolady, dep jazdy Zakon.kz.
Alaıda, jyldamdyq pen aınalma joldyń barlyq artyqshylyqtaryna qaramastan, aýyl turǵyndary úshin jergilikti sheneýnikter men basqarýshy kompanıaǵa qoıar kóptegen suraǵy bar bolyp shyqty. Adamdar uzaq merzimdi qurylystan keıin jumysshylar artynda tonna qoqys qaldyryp, tipti ony tazartý nıetteri joq ekenin aıtyp narazylyq bildirdi.
Sondaı-aq búginde aýyr tehnıka ary-beri jóńkilgen aýylishilik joldardyń da jaǵdaıy máz emes. Barlyq shurq-tesik. Endi mundaı joldarmen júrýdiń ózi de múmkin emes. Oǵan nazar aýdaryp jatqan eshkim joq. Jergilikti turǵyndar osydan keıin mundaı ýchaskelerde jol apaty kóbeıetindigine senimdi.
"Ózimiz salǵan jol bolǵan. Qazir barlyǵy oıdym-oıdym bolyp jatyr. Aýyldyń kireberisteri byt-shyt, adam shoshıdy. Ondaı jolmen júrý múmkin emes. Bul máseleler qashan sheshiledi? Biz jol salǵan kompanıaǵa aıtsaq, olar ákimdikke jón silteıdi. Ákimdik búdjette aqsha joq ekenin aıtyp, keri ÚAAJ basshylyǵyna silteme jasaıdy. Aqyry bul máseleni óz betimizshe sheshý kerek bolamyz ba dep qaýiptenemin", – dep shaǵymdandy Qyzylqara aýylynyń turǵyny Rýstam Oınarov.
Sheneýnikter jaǵdaıdy bajaılap, jaqyn arada buzylǵan joldardy kim jóndeıtinin sheshýge ýáde berdi. Búgin kezdesýde tek keıbir máseleler ǵana aıtyldy. Jergilikti turǵyndar iri trassa iske qosylǵannan keıin de kóp daýly máseleler týyndaıtyndyǵyna senimdi.