Kólik polıseıleri júk vagondarynan turmystyq tehnıka urlaǵan bir top adamdy ustady.
Almaty-1 stansıasyndaǵy jelilik polısıa basqarmasynyń qyzmetkerleri jedel-izdestirý is-sharalaryn júrgizý barysynda Almaty oblysynyń eki turǵynyn ustady, dep habarlaıdy Almaty-akshamy.kz.
Bul jóninde kóliktegi polısıa departametiniń bastyǵy Baqytjan Malybaev habarlady.
– Kúdiktilerdiń, aldyn ala sóz baılasý arqyly Jetigen stansıasynda QHR – Almaty baǵyty boıynsha qatynaıtyn júk vagondarynan birneshe ret turmystyq tehnıkalardy urlaǵandary anyqtaldy (akvarıýmǵa arnalǵan jabdyq – 43 dana, 14 kondısıoner, 114 sý jylytqysh, 63 elektr plıta) dep málimdedi B. Malybaev.
Qasaqana jasalǵan qylmystyq áreketterdiń saldarynan jekemenshik kompanıalarǵa 9 mln teńgeden astam somaǵa materıaldyq zalal keltirilgen. Kólik polıseıleriniń jedel ári úılesimdi júrgizgen is-sharalarynyń arqasynda jábirlenýshilerge keltirilgen zalal tolyq kólemde ótelgen.
Sondaı-aq vedomstva basshysynyń aıtýynsha, qazirgi ýaqytta atalǵan faktige qatysty Almaty 1 stansıasyndaǵy JPB qyzmetkerleri Qylmystyk kodekstiń 188-babtyń 3-bóligi 3-tarmaǵy boıynsha sotqa deıingi tergeý júrgizilip jatyr. Onda múlki tárkilenip, eki jyldan jeti jylǵa deıingi merzimge bas bostandyǵyn shekteý, ne sol merzimge bas bostandyǵynan aıyrý qarastyrylǵan.