Erjan Babaqumarov «Jomart júrek-2021» mesenattar baıqaýynyń jeńimpazdaryna marapattar tapsyrdy
Búgin Almatyda jyl saıynǵy «Jomart júrek» baıqaýynyń qorytyndysy shyǵaryldy, dep habarlaıdy Almaty-akshamy.kz
«Jomart júrek» baıqaýy Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń «Rýhanı jaǵyrý» baǵdarlamasy aıasynda quryldy jáne Memleket basshysy Qasym-Jomart Toqaev alǵa qoıǵan kásipkerler men jeke tulǵalardyń qaıyrymdylyq jobalaryna qatysýlaryn janama yntalandyrý tetikterin engizý máselesin sheshýge múmkindik beredi.
Baıqaýdyń basty maqsaty – eń jarqyn jáne mańyzdy qoǵamdyq bastamalardyń oń tájirıbesin dáripteý arqyly qaıyrymdylyq jasaýdy yntalandyrý jáne damytý.
Almaty ákiminiń orynbasary Erjan Babaqumarov baıqaýdyń laýreattaryn marapattap, halyqtyń ál-aýqatyn jaqsartýǵa jáne qalanyń gúldenýine qosqan úlesteri úshin alǵysyn bildirdi. Bıyl Almatyda qalanyń ınfraqurylymyn abattandyrý men jaqsartý boıynsha iri áleýmettik jobalar júzege asyryldy. Almatynyń mesenattary túrli baǵyttar – bilim, sport, mádenıet jáne t.b. boıynsha barynsha aýqymdy qaıyrymdylyq sharalaryn júzege asyrdy.
Syılyqtar bes nomınasıa boıynsha berildi. Almatyda ótken baıqaýdyń jeńimpazdary:
«Jyl tulǵasy» belsendi qaıyrymdylyq qyzmeti úshin «Daco Motors KZ» JSHS bas dırektory Syrymbek Taýǵa berildi. Mesenat 8 500 otbasyǵa azyq-túlik sebetterimen jáne medısınalyq qyzmetkerlermen qamtamasyz etý arqyly kómektesti. Naýqas balalarǵa arnalǵan ońaltý ortalyǵynyń qurylysyna 20 mıllıon teńge bóldi. «Mektepke jol» baǵdarlamasy aıasynda 100 balaǵa oqý quraldaryn, 10 planshet pen 5 noýtbýk alyp berdi. Úsh otbasynyń turǵyn úı satyp alý úshin bastapqy tóleminiń 30%-yn tóledi, balalar úıine, «Saýran», «Alataý» qaıyrymdylyq qorlaryna kómek kórsetedi.
«Jyl mesenaty» atalymy belsendi mesenattyq qyzmeti úshin «METALL PROM GROUP» JSHS dırektory Dolkýntaı Abdýlhalılge berildi.
Kompanıa qıyn jaǵdaıǵa tap bolǵan 5 myń otbasyǵa azyq-túlik sebetteri túrinde kómek kórsetti. Ol Almatydaǵy jas sportshylarǵa jáne birqatar sport klýbtaryna demeýshilik jasaıdy. Jasóspirimder arasyndaǵy respýblıkalyq jarystardy uıymdastyrýǵa demeýshilik kórsetti. Dolkýntaı Abdýlhalıl bıyl qaıyrymdylyqqa barlyǵy 88,7 mıllıon teńge bóldi.
«Týǵan ólke» atalymyna kishi Otandy qoldaý boıynsha áleýmettik mańyzy bar jobalardy júzege asyrǵany úshin Muhamethan Sabyrjan laıyq dep tanyldy. Ol 4 balalar sport alańynyń qurylysyna demeýshilik jasady, muqtaj otbasylarǵa úılerin jóndeýge 4 mıllıon teńge kóleminde kómek kórsetti.
«Jyldyń úzdik uıymy» nomınasıasy qaıyrymdylyq baǵdarlamasyn tıimdi iske asyrǵany úshin «BAZIS-A Corp» JSHS-ne tabys etildi. Kompanıa Bostandyq aýdanyndaǵy №146 mektepke 300 balaǵa arnalǵan qosalqy korpýsty óz qarjysyna saldy. Kásiporyn №65 mektep aýmaǵynda 300 oryndy korpýs salýdy josparlaýda.
«Jyldyń úzdik qamqorshysy» atalymymen áleýmettik mańyzdy ózgerister men túrlendirý boıynsha qaıyrymdylyq kómegi úshin «Kometa» JSHS marapattaldy. Kompanıa qaıyrymdylyq sharalaryna qatysty, múmkindigi shekteýli balalarǵa kómek kórsetedi, mobıldi aýrýhanalarǵa sý jetkizýge demeýshilik kómek retinde 10 mln qarjy bóldi. Olar №1 balalar úıine, «Januıa» arnaıy keshenine, №123, №149 balabaqshalarǵa jáne pedıatrıanyń ǵylymı ortalyǵyna únemi kómek kórsetedi.
«Bizdiń kompanıa qaıyrymdylyqpen 10 jyl boıyna aınalysyp keledi. Biz balalar úıine kómektesemiz, ınteraktıvti taqtalar, oqý oıyndary men kitaptar satyp aldyq, balalarǵa arnalǵan tegin sport zalyn ashtyq, otbasylarǵa úı salýǵa kómektestik. Bul marapat - men úshin úlken motıvasıa. Joǵary baǵa qalaǵa, turǵyndarǵa kómektesýge degen umtylysymyzdy odan ári arttyrady», - dedi Dolkýntaı Abdýlhalıl.
Aıta keterligi, mesenattar megapolıs pen onyń turǵyndaryna turaqty túrde kómek kórsetedi. Demek, uıymdastyrýshylar atap ótkendeı, mundaı is-sharalar bıznes-qurylymdardy, mesenattardy, úkimettik emes uıymdardyń ókilderi men eriktilerdi jaqsy ister jasaýǵa yntalandyrady jáne meıirimdilik ıdeıasyn nasıhattaıdy.