14-16 qańtar aralyǵynda respýblıka kóleminde jergilikti atqarýshy organdar, Kólik mınıstrliginiń kólik komıtetiniń aýmaqtyq bólimsheleri jáne jurtshylyq ókilderiniń qatysýymen «Tasymaldaýshy» jedel-profılaktıkalyq is-sharasy ótýde.
İs-sharanyń basty maqsaty – qoǵamdyq kóliktegi quqyq buzýshylyqtarǵa «múldem tózbeýshilik» qaǵıdatyn ustaný, jolaýshylar tasymaly salasyndaǵy zańnamanyń saqtalýyn qadaǵalaý jáne qaýipsizdik deńgeıin arttyrý, dep habarlaıdy aqshamnews.kz Polisia.kz-ke silteme jasap.
– Qazirgi ýaqytta qyzmetkerlerimiz jolaýshylardy tasymaldaý barysynda qaýipsizdik talaptarynyń saqtalýyn qamtamasyz etý maqsatynda avtokólik kompanıalary men jeke tasymaldaýshylardy tekserýde. Sonymen qatar zańsyz mıgranttar men ruqsatsyz jumys istep jatqan tasymaldaýshylardy anyqtaý úshin kóshi-qon polısıasymen birlesken reıdter júrgizilýde. Aldyńǵy sheptegi bólimshelerdiń jeke quramy birneshe ret jáne júıeli túrde quqyq buzýshylyq jasaǵan adamdar men izdeýde júrgen kólikterdi anyqtaý úshin barlyq tirkeý derekter bazasy boıynsha júrgizýshilerdi tekserip jatyr, – dep málimdedi Almaty qalalyq polısıa departamenti jergilikti polısıa qyzmeti basqarmasy bastyǵynyń orynbasary Tımýr Noǵaıbaev.