Almaty qalasynda jaqyn arada jedel járdem qyzmetinde smart-beınejetondar qoldaný josparlanyp otyr.
Bul qurylǵylar medısına qyzmetkerleriniń qaýipsizdigin arttyrý maqsatynda engizilýde. Qazirdiń ózinde atalǵan tehnologıa elordada bes jedel járdem brıgadasynda pılottyq rejımde synaqtan ótip jatyr, dep habarlaıdy aqshamnews.kz.
Smart-beınejetondar qońyraýlardy beınetirkeýge múmkindik beredi jáne tótenshe jaǵdaı týyndaǵan kezde jedel áreket etý quraly retinde qyzmet atqarady.
Atalǵan sheshim – Qazaqstannyń densaýlyq saqtaý júıesin sıfrlandyrý aıasynda qolǵa alynǵan birqatar jobalardyń biri. Densaýlyq saqtaý mınıstrliginde vedomstvo basshysy Aqmaral Álnazarova men «Qazaqtelekom» AQ Basqarma tóraǵasy Baǵdat Mýsınniń qatysýymen ótken kezdesýde jasandy ıntellekt qoldanylatyn sıfrlyq jobalar keńinen talqylandy.
Usynylǵan bastamalar qatarynda:
• «JI-terapevt» júıesi. Aqmola oblysynyń medısınalyq uıymdarynda synaqtan ótip jatqan bul servıs dáriger men pasıent arasyndaǵy dıalogty naqty ýaqyt rejıminde taldap, 80% dáldikpen aldyn ala dıagnoz qoıa alady. Sondaı-aq dárigerdiń qujat toltyrý ýaqytyn 40%-ǵa qysqartady.
• Qashyqtan baqylaýǵa arnalǵan telemedısınalyq qosymsha. Qazaqstandyqtar bul qosymshanyń kómegimen qan qysymyn, júrek soǵysyn, dene temperatýrasyn, qandaǵy ottegi men glúkoza deńgeıin ólsheı alady. Atalǵan sheshim ásirese aýyldyq jerlerdegi medısınalyq qyzmettiń qoljetimdiligin arttyrýǵa baǵyttalǵan.
Kezdesý sońynda taraptar medısınalyq ınfraqurylymdy sıfrlandyrý men pılottyq jobalardy keńeıtýge ýaǵdalasty.
Baǵdat Mýsınniń aıtýynsha, «Qazaqtelekom» AQ medısına uıymdaryna beınebaqylaý, qoljetimdilikti baqylaý, dabyl batyrmasy jáne polısıanyń jedel basqarý ortalyqtarymen ıntegrasıalanǵan beınetaspa júıesi syndy qaýipsizdik quraldaryn usynýǵa daıyn.
Aqmaral Álnazarova:
«Medısına qyzmetkerleriniń qaýipsizdigi men jumys tıimdiligi – basty basymdyq. Kúzet, shuǵyl áreket etý júıeleri jáne telemedısınaǵa qatysty jobalar densaýlyq saqtaý salasyndaǵy ózekti syn-qaterlerge naqty jaýap beredi», — dep atap ótti mınıstr.