Almatyda memleket jáne qoǵam qaıratkeri, Memlekettik syılyqtyń laýreaty, jazýshy, teatr synshysy, profesor Áshirbek Syǵaıdyń qurmetine ornatylǵan memorıaldy taqta saltanatty túrde ashyldy, dep habarlaıdy Almaty-akshamy.kz.
«Bul tarıhı mańyzdy sheshim dep esepteımin. Búgin asa kórnekti teatr uıymdastyrýshysyna jáne synshysyna, qazaq óneriniń shynaıy jankúıerine eskertkish taqta ornatyldy. Áshirbek aǵanyń shyǵarmashylyq ómiri bizdiń súıikti qalamyzben tyǵyz baılanysty. Onyń esimi, murasy halqymyzdyń jadynda, shákirtteriniń esinde máńgi qalady», – dep atap ótti Almaty ákiminiń orynbasary Arman Qyryqbaev.
Teatr synshysyn eske alýǵa tanymal óner qaıratkerleri, onyń ishinde Asanáli Áshimov, Dýlat Isabekov, Ulyqbek Esdáýlet, Medetbek Temirhan, Nurlan Orazalın, Esmuhan Obaev, Elýbaı Smaǵul, Qalı Sársenbaı, Hafız Esimov, Baqyt Bókebaı, Erkin Jýasbek, Talǵat Esenalıev, t.b jazýshylar men ártister keldi.
Memorıaldyq taqta belgili teatr synshysy 1980-1999 jyldar aralyǵynda 20 jylǵa jýyq turǵan Jibek Joly dańǵyly, 12A (S.Máýlenov kóshesiniń qıylysy) mekenjaıyndaǵy úıdiń qabyrǵasyna ornatyldy.
Áshirbek Syǵaı - Qazaqstannyń sahna óneriniń damýyna eleýli úles qosqan qazaq teatrtaný ǵylymynyń negizin salýshylardyń biri, «İńkár shaq» (1978), «Syr sandyq», «Sahnaǵa sapar», «Jarnama aldyndaǵy oı», «Sahna sańlaqtary» (1998), «Teatr taǵylymy» (2003), «Án - taǵdyr», «Tańǵajaıyp teatr», taǵy basqa shyǵarmalardyń avtory. Onyń eńbekteri óner jáne teatr teorıasy salasyndaǵy oqýlyqtarǵa aınaldy.