Búgin Ortalyq mýzeıde ózindik úni, ózindik qoltańbasy, shyǵarmashylyq baǵyt-baǵdary bar qazaqtyń kórnekti jazýshysy, dramatýrg, memlekettik syılyqtyń laýreaty Baqqoja Muqaıdyń 75 jyldyǵyna arnalǵan eske alý keshi ótti, dep habarlaıdy Almaty-akshamy.kz.
Jazýshynyń jumysy - asa ardaqty da, óte jaýapty jumys. Ol - adam janynyń músinshisi. Óıtkeni ómir tájirıbesi az oqyrman jas «osyndaı bolsam» dep ańsap, arman etken asyl muratyn kóbinese jazýshynyń jan syryn quıyp tebirene jazǵan týyndysynan tabady.
Artyna mol mura qaldyrǵan qalamger 1948 jyldyń 31 qańtarynda Almaty oblysy, Raıymbek aýdany, Narynqol aýylynda dúnıege kelgen.
Baqqoja Muqaı mektepte oqyp júrgende-aq óziniń jazýshy bolatynyn bilgen. Alǵashqy týyndylaryn 17-18 jasynda jarıalaǵan ol jazýshy kóp bilýi tıis degen ustanymmen kóp oqyp, kóp izdenedi. Almatyda oqyp júrgen kezde Baqqoja Muqaıdyń alǵashqy novelasy - «Jańbyr jaýyp tur» «Lenınshil jas» basylymynda jaryq kórip kóptiń yqylasyna bólengen. Qazaq memlekettik ýnıversıtetiniń jýrnalısıka fakúltetin támámdáp, 1965 jyly Raıymbek aýdandyq «Komýnızm nury» (qazirgi «Hantáńiri») gazetinde eńbek jolyn bastaǵan. Ár jyldary «Bilim jáne eńbek», «Juldyz» jýrnaldarynda, Qazaqstan Jazýshylar odaǵynda, 1990-1995 jj. Mádenıet mınıstrliginiń repertýarlyq redaksıalyq alqasynda bas redaktor, basqarma basshysy qyzmetterin atqarady.
Tabıǵatynan aıryqsha shyǵarmashylyq qýat pen tanym ıesi óz talantyn babynda ustap, únemi tárbıelep úzdik týyndylar usynǵan. Aıtalyq, «Jańbyr jaýyp tur», «Ómir arnasy», «Aqqý sazy», «Mazasyz maýsym», t.b shyǵarmalar men birneshe dramalyq týyndylar jáne «Jalǵyz jaıaý», «Ómirzaıa» romandary sonyń jemisi. 2000 jyly «Ómirzaıa» romany úshin jazýshyǵa Qazaqstan Respýblıkasynyń Memlekettik syılyǵy berilgen.
Jıyn barysynda alǵashqy sóz kezegin alǵan Qazaqstan Respýblıkasy Prezıdentiniń keńesshisi Otarbaev Málik Nurjanuly Qasym-Jomart Kemeluly Toqaevtyń tapsyrmasy boıynsha arnaıy kelgenin aıtyp, quttyqtaýyn jetkizdi. «Kórnekti jazýshy, dramatýrg, belgili pýblısıs, qoǵam qaıratkeri, Memlekettik syılyqtyń laýreaty Baqqoja Muqaı sanaly ǵumyryn ult rýhanıatyn baıytýǵa arnaǵan jáne el tarıhyn kórkem sózben kestelegen qarymdy qalamger. Jazýshylyq, prozalyq jáne dramalyq týyndylary - ádebıetimizdiń altyna qoryna qosylǵan qazyna. Ol Almaty oblysynda «Qazaq qoǵamyn» quryp, ana tilimizdiń mártebesin arttyrýǵa zor úles qosty», - delingen Qazaqstan Prezıdentiniń arnaıy quttyqtaý hatynda.
Keshtiń qurmetti qonaqtary – Baqqoja Muqaıdyń inisi Aqyljan Seıdinuly, aqyn, dramatýrg, memleket jáne qoǵam qaıratkeri N.Orazalın, jazýshy, kınodramatýrg, T.Júrgenov atyndaǵy Óner akademıasynyń profesory Qazaqstannyń eńbek sińirgen qaıratkeri S.Elýbaı tushymdy oılary, jaqsy estelikterimen bólisti.
Kezdesý keshine arnaıy mýzykalyq baǵdarlamamen kelgen J.Elebekov atyndaǵy respýblıkalyq estrada-sırk koledjiniń stýdentteri kópshilikti óz ónerlerimen tánti etti.
Shara sońynda qonaqtar Baqqoja Muqaıǵa arnalǵan kórmemen tanysty. Munda jazýshynyń ár jyldardaǵy shyǵarmalary, kózi tirisinde jaryqqa shyqqan bes tomdyq shyǵarmalar jınaǵy, qujattary men sýretteri, jeke zattary qoıyldy. Onyń ishinde jazýshynyń kózildirigi, belbeýi, Q.Iasaýı atyndaǵy halyqaralyq qazaq-túrik ýnıversıteti syılaǵan estelik saǵaty, «Parker» qalamy, fotoaparaty, telefony jáne ózge de jazýshynyń tutynǵan zattary. Dramatýrg jazýshy B.Muqaıdyń Qazaqstanda jáne shet elderdegi teatrlarda qoıylǵan dramalyq shyǵarmalary kórmede afıshalyq týmbada kórsetildi. Atap aıtqanda, Qazaqtyń Ǵ.Músirepov atyndaǵy memlekttik jastar men balalar teatrynda qoıylǵan «Ómirzaıa» tragedıasy, Mahambet atyndaǵy Atyraý oblysaralyq qazaq drama teatrynda sahnalanǵan «Kúnde meıram, kúnde toı» spektakli, Ózbek akademıalyq teatryndaǵy «Haetdan týıgan tún» dramasy jáne taǵy basqalary.