Oblystyq joldardy mobıldi keń jolaqty jelilermen qamtý boıynsha jumysty aıaqtaý josparlanyp otyr
Úkimette QR Premer-Mınıstri Álıhan Smaıylovtyń tóraǵalyǵymen ótken keńeste Sıfrlyq transformasıa, IT-salany damytý jáne kıberqaýipsizdik tujyrymdamasynyń 2023-2029 jyldarǵa arnalǵan jobasy qaraldy, dep habarlaıdy Almaty-akshamy.kz.
Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın Tujyrymdamany iske asyrý 5 mınýt ishinde kórsetiletin memlekettik qyzmetterdiń úlesin 90%-ǵa deıin ulǵaıtýǵa, memlekettik organdardyń bıznes-prosesterin tolyq sıfrlandyrýǵa, 250 myńnan astam biliktiligi joǵary IT-kadrlardy daıarlaýǵa, IT-ónimder men qyzmetter eksportynyń kólemin $1,5 mlrd-qa deıin ulǵaıtýǵa, sondaı-aq Astana Hub tehnoparki aıasynda shamamen 1 trln teńge ınvestısıa tartýǵa múmkindik beretinin baıandady.
«Jalpy, jastar arasynda IT-sala ekonomıka, qarjy jáne quqyqtanýdan góri kóbirek tańdalady. Jastardyń kóbi IT-ınjınırıngke jáne osy salanyń basqa da baǵyttaryna barǵysy keledi. Mınıstrlik bul úrdisti belsendi túrde qoldaýy kerek», — dedi Álıhan Smaıylov.
Sonymen qatar keńeste Tujyrymdama aıasynda respýblıkada óńirlik sıfrlyq habty qalyptastyrý, baılanys salasyn odan ári demonopolızasıalaý, kıberqaýipsizdikti keshendi nyǵaıtý jáne densaýlyq saqtaý, bilim berý, azamattyq qaýipsizdik salalarynda jasandy ıntellektini damytý úshin negiz qurý jónindegi sharalar iske asyrylatyny atap ótildi.
Sonymen qatar azamattar men bıznesti jyldamdyǵy joǵary ınternetpen (keminde 100 Mbıt/s), al respýblıkalyq jáne negizgi oblystyq joldardy mobıldi keń jolaqty jelilermen qamtý boıynsha jumysty aıaqtaý josparlanyp otyr.