Joba jyl boıy jumys isteıdi.
Qaladaǵy 16 mektepte kókónister men jemister ósirýge arnalǵan jylyjaılar paıda bolady. «Kók qarlyǵashtardyń» biri búgin Jetisý aýdanyndaǵy № 177 mektebinde ashyldy, dep habarlaıdy Almaty-akshamy.kz.
«Jasyl mektep» bilim berý ekologıalyq jobasyn Bolat Ótemuratovtyń qory qala ákimdigimen birge júzege asyryp jatyr. Jylyjaılardaǵy sabaqtar mektep baǵdarlamasyn praktıkalyq jattyǵýlarmen tolyqtyrady jáne balalardy tabıǵatty qurmetteýge úıretedi. Jańa oqý jylynda osy bastama boıynsha 5-7 synyp oqýshylary úshin fakúltatıvtik sabaqtar ótkiziledi.
«Jasyl tehnologıalar men ekologıalyq oılaý - bul bizdiń kúndelikti ómirimizdiń ajyramas bóligine aınalatyn álemdik tendensıa. Sondyqtan balalardy ekologıalyq mádenıetke tárbıeleý jáne qorshaǵan ortany qurmetteý erte jastan bastap óte mańyzdy», - deıdi Bolat Ótemuratov qorynyń dırektory Marat Aıtmaǵambetov.
Ol jobaǵa ósimdik sharýashylyǵy, agronomıa salasyndaǵy eń jaqsy mamandar, sondaı-aq Almaty oblysynyń fermerleri tartylatynyn, olar mektep oqýshylary men muǵalimderge óz tájirıbelerimen bólisetindigin atap ótti.
Barlyq jylyjaılar zamanaýı tamshylatyp sýarý, jylytý jáne jaryqtandyrý júıelerimen jabdyqtalǵan. Joba jyl boıyna jumys isteıdi. Jazdyń sońyna deıin osyndaı jylyjaılar qalanyń barlyq aýdandaryndaǵy taǵy 15 mektepte ashylady. Sodan keıin jobaǵa Shymkent pen Nur-Sultan qalalary qosylady.