5 naýryz kúni Almatyda dástúrli qalalyq stýdenttik «Jas Gala-2025» festıvaliniń saltanatty ashylýy ótedi, dep habarlaıdy aqshamnews.kz.
Bul týraly Almaty óńirlik komýnıkasıalar qyzmetinde ótken baspasóz konferensıasynda Jastar saıasaty basqarmasynyń ókilderi men uıymdastyrýshylar habarlady.
«Jas Gala» festıvali bıyl tórtinshi ret ótpek. Sharanyń basty maqsaty – talantty jáne kreatıvti jastardy qoldaý, stýdenttik shyǵarmashylyqty damytý.
«Almaty – jastardyń, sonyń ishinde stýdentterdiń qalasy. Qalanyń 35 joǵary oqý orny men 88 kolejinde elimizdiń túkpir-túkpirinen kelgen 286 myńnan astam stýdent bilim alýda. Olardyń shyǵarmashylyq belsendiligin arttyryp, kásibı damýyna yqpal etý maqsatynda qalalyq ákimdik jyl saıyn túrli is-sharalardy júzege asyrady. Sonyń ishinde eń jarqyn jobalardyń biri – kóktemgi stýdenttik festıvál «Jas Gala», – dedi Jastar saıasaty basqarmasy basshysynyń orynbasary mindetin atqarýshy Nursultan Bekqaıyrov.
Festıvál vokal, horeografıa, mobılografıa, teatr, aspapta oryndaý baǵyttary boıynsha ótkiziledi. Festıvál ýnıversıtettik, jáne qalalyq kezeńderden turady. Ýnıversıtettik irikteýden ótken talantty jastar óz oqý ornynyń namysyn qalalyq deńgeıde qorǵaıdy.
Festıváldiń jalpy júlde qory 8 500 000 teńgeni quraıdy. Onyń ishinde ár nomınasıaǵa 1 500 000 teńgeden, «Eń úzdik stýdenttik top» saıysyna 1 000 000 teńge júlde qory qarastyrylǵan.
Baıqaýda mádenıet jáne óner qaıratkerleri, qoǵamdyq pikir kóshbasshylary, óner júldyzdary qazylyq etedi.
Joba jetekshisi Juldyz Jaqsybaıdyń aıtýynsha, «Jas Gala-2025» festıvaliniń basty ereksheligi – onyń taqyryptyq baǵyttylyǵy. Bıylǵy festıvál Uly Jeńistiń 80 jyldyǵyna, Jumysshy jastar jylyna, Qazaqstan halqy Assambleıasynyń 30 jyldyǵyna, N.Tlendıevtiń 100 jyldyǵyna, Sh.Qaldaıaqovtyń 95 jyldyǵyna arnalady. Uıymdastyrýshylardyń pikirinshe, bul jastardyń patrıottyq rýhyn nyǵaıtyp, ulttyq muraǵa degen qyzyǵýshylyǵyn arttyrýǵa yqpal etedi.
«Festıvál aıasynda qatysýshylar tek jarysyp qana qoımaı, arnaıy semınarlarǵa, sheberlik sabaqtaryna qatysyp, mádenıet jáne óner salasynyń tanymal tulǵalarymen kezdesedi», – dedi J. Jaqsybaı.
Sonymen qatar joba barysynda qyrkúıek aıynan bastap Halyqaralyq stýdentter kúnine oraı JOO stýdentterine arnalǵan «Eń úzdik stýdenttik top» baıqaýy uıymdastyrylady. Baıqaý qaladaǵy barlyq joǵary oqý oryndaryn qamtyp, eń belsendi jáne uıymshyl stýdenttik qaýymdastyqtardy anyqtaýǵa múmkindik beredi.
«Bul – ózińdi kórsetýge, tanylýǵa jáne óner salasynda kásibı damýǵa jasalǵan biregeı múmkindik. Jeńimpazdar qundy syılyqtarǵa ıe bolyp qana qoımaı, Almatynyń mádenı ómirine óz úlesin qosa alady», – dep atap ótti N. Bekqaıyrov.
Festıváldiń fınaly men marapattaý rásimi 25 sáýirde ótedi. Uıymdastyrýshylar bul baıqaýǵa júzdegen jas qatysyp, ony jyldyń basty jastar oqıǵalarynyń birine aınalady dep kútýde. Sondaı-aq, barsha talantty jastardy «Jas Gala-2025» festıvaline qatysýǵa shaqyrady.