Almaty qalasynyń Óńirlik komýnıkasıalar qyzmetiniń alańynda «Janashyr» halyqaralyq qoǵamdyq qorynyń prezıdenti Jańyl Apetova 2024 jyly uıym jumysynyń nátıjelerin jáne memlekettik áleýmettik tapsyrystardy iske asyrý qorytyndylaryn usyndy, dep habarlaıdy aqshamnews.kz
1997 jyly qurylǵan uıym 30 jylǵa jýyq ýaqyt boıy ulttyq qundylyqtardy saqtaýǵa, azamattyq qoǵamdy qoldaýǵa jáne jastardy patrıottyq tárbıeleýge baǵyttalǵan jobalardy belsendi túrde júzege asyryp keledi. Osy jyldar ishinde qor 5000-nan astam is-shara ótkizdi, olardyń kópshiligi qala men el úshin mańyzdy boldy.
2024 jyly «Janashyr» qory úsh Memlekettik áleýmettik tapsyrysty sátti júzege asyrdy, onyń ishinde — zańgerlik konsýltasıalar, júzdegen aqparattyq materıaldardy jarıalaý jáne saýda ortalyqtaryndaǵy mobıldi toptardyń jumysyn qamtıtyn tutynýshylardyń quqyqtaryn qorǵaý jobasy bar.
«Biz 5000-ǵa jýyq keńes ótkizdik, 12 oqý ornynda kezdesýler uıymdastyrdyq, beınerolıkter jasadyq jáne áleýmettik jelilerde belsendi jumys istedik. Bul azamattardyń óz quqyqtary týraly habardarlyǵyn arttyrý úshin úlken qadam boldy», — dep atap ótti Jańyl Apetova.
Jyldyń jarqyn oqıǵalarynyń biri 235 otbasy qatysqan «Mereıli otbasy» baıqaýy boldy. Saltanatty marapattaý rásimi shilde aıynda ótti, al baıqaý qorytyndysy BAQ-ta keńinen jarıalandy. Qor basshysy mundaı jobalar otbasylyq qundylyqtardy nasıhattaý úshin erekshe mańyzdy ekenin atap ótti.
«Patrıottyq rýh – basty qundylyq» jobasy jastar arasynda patrıotızmge tárbıeleýge jáne Jeltoqsan oqıǵasynyń batyry Erbol Sypataevty eske alýǵa arnaldy. Joba aıasynda senbilikter, esse baıqaýy, jeltoqsan oqıǵasyna qatysýshylarmen kezdesýler jáne onyń týǵanyna 60 jyl tolýyna oraı «Qazaq kúresi» boıynsha týrnır uıymdastyryldy.
«Biz jastarǵa 1986 jylǵy jeltoqsandaǵy oqıǵalardyń sımvoly bolǵan táýelsizdik pen patrıotızm rýhyn jetkizýge tyrysamyz», - dep tolyqtyrdy ÓKQ spıkeri.
Qordyń barlyq jobalary Almaty Azamattyq ortalyǵynyń sarapshylary tarapynan qatań baqylaýdan ótedi. Oryndalǵan jumys týraly esepter muqıat tekserilip, sodan keıin ǵana tapsyrys berýshiler qabyldaıdy. Jańyl Amantaıqyzynyń aıtýynsha, 2024 jyldyń nátıjeleri uıym jumysynyń joǵary tıimdiligin rastaıdy.
«Biz árqashan qoǵamnyń kútken úmitin qanaǵattandyrýǵa, onyń damýyn qoldaýǵa jáne memleket pen azamattar arasyndaǵy kópir bolýǵa tyrysamyz», — dep qorytyndylady J.Apetova.