Almatydaǵy Balalarǵa shuǵyl medısınalyq kómek kórsetý ortalyǵynyń bazasynda jańa týǵan nárestelerdi jansaqtaý jaǵdaıynda kútip-baptaýǵa arnalǵan mamandandyrylǵan bólimshe ashyldy. Bul týraly ortalyq dırektory Álibek Smaǵulov 2025 jyldyń jumys qorytyndysy tanystyrylymynda málimdedi. İs-sharaǵa qalalyq Qoǵamdyq densaýlyq saqtaý basqarmasynyń basshysy Marat Pashımov qatysty.
Onyń aıtýynsha, 2025 jyly qyrkúıekten bastap jumys istep kele jatqan bólimshe 16 orynǵa arnalǵan. Munda shuǵyl túrde túsken nárestelerge kómek kórsetiledi, sondaı-aq jansaqtaýdan keıingi balalarǵa qarqyndy terapıa jáne erte ońaltý qyzmetteri qarastyrylǵan. Úsh aıdyń ishinde 103 jańa týǵan nárestege medısınalyq kómek kórsetildi.
Bir jylda ortalyqta 235 náreste emdelip, olardyń 52-sine týa bitken damý aqaýyna baılanysty shuǵyl ota jasaldy. Pasıentter sanynyń ósýi bólimsheniń múmkindikterin keńeıtýge jáne jańa oryndardy ashýǵa negiz boldy.
2025 jyldan bastap ortalyqta 0-den 18 jasqa deıingi balalarǵa arnalǵan 12 oryndyq otorınolarıngologıa jáne jaq-bet hırýrgıasy bólimshesi táýlik boıy qyzmet kórsetedi. Alǵashqy bes aıda 83 balaǵa shuǵyl jáne josparly kómek kórsetildi. Jańa bólimshelerdiń ashylýy kórsetiletin medısınalyq kómektiń aıasyn keńeıtýge múmkindik berdi.
Ótken jyly 140,6 myńnan astam bala medısınalyq kómek aldy, bul 2024 jylmen salystyrǵanda 22,5%-ǵa kóp. Josparly tártipte Qazaqstannyń túrli óńirlerinen kelgen 1 500-den astam naýqasqa mamandandyrylǵan hırýrgıalyq jáne konservatıvti kómek kórsetildi.
2025 jyly ortalyqta dárilik zattar men medısınalyq buıymdardy esepke alýdy qamtamasyz etetin gospıtáldyq farmasıa bólimshesi de ashylyp, halyqaralyq GPP standartyna saı sertıfıkat aldy.
Jyl qorytyndysy boıynsha ortalyq eń joǵary akredıtasıalyq sanat ıelenip, Qazaqstanda «Jyldyń úzdik balalar stasıonary» dep tanyldy.