Almaty qalasynda konteınerlik saýdanyń dáýiri aıaqtalyp, osy zamanǵy, jaıly ári ashyq saýda formatyndaǵy bazarlarǵa kóshý kezeńi bastaldy. Bul týraly Almaty qalasy ákiminiń orynbasary Oljas Smaǵulov Almaty óńirlik komýnıkasıalar qyzmetinde ótken baspasóz konferensıasynda habarlady.
«Bizdiń maqsatymyz – bazarlardy qaıta salý ǵana emes, qaýipsiz jáne qolaıly saýda keńistigin qalyptastyrý. Munda bıznes damyp, qala turǵyndary ózin jaıly sezinýi tıis. Bul satyp alýshylardy, kásipkerlerdi jáne qalanyń ózin qorǵaýǵa baǵyttalǵan «Saýda qyzmetin retteý týraly» QR Zańynyń talaby», – dep atap ótti Oljas Smaǵulov.
Búginde Almatyda 29 bazar tolyqtaı jańǵyrtylyp, olardyń aýmaǵynda kúrdeli qurylystar salyndy, ınjenerlik ınfraqurylym jańartyldy. Taǵy 21 bazar jańǵyrtylyp jatyr, ol jumys 2026 jyldyń sońyna deıin aıaqtalady. Eskirgen «Jibek joly» bazarynyń ornyna jańa menshik ıesi osy zamanǵy turǵyn úı kesheni men saýda ortalyǵyn salǵaly otyr.
Jalpy, sońǵy jyldary qaladaǵy bazarlardyń sany 59-dan 51-ge deıin azaıdy, bul tórt nysannyń saýda ortalyqtaryna qaıta beıindelýimen baılanysty.
Ákimdik kásipkerlerdiń alańdaýshylyǵyn túsinedi. Jalǵa alýa baǵasynyń ósýi tabysty arttyrý maqsatynda emes, qaıta jańǵyrtýdan keıingi paıdalaný men komýnaldyq shyǵyndardyń kóbeıýine baılanysty bolyp otyr. Sebebi jańartylǵan bazarlar ortalyqtandyrylǵan jylý, sý jáne káriz júıelerine qosylady, sanıtarlyq talaptar men abattandyrylǵan aýmaq qamtamasyz etiledi. Rekonstrýksıa kezeńinde jalǵa alýshylarǵa saýda oryndary ýaqytsha jeńildikpen beriledi.
Aıta keteıik, QR Ákimshilik quqyq buzýshylyq týraly kodeksiniń 204-2-babyna sáıkes, bazarlardy modernızasıalamaý ákimshilik jaýapkershilikke ákep soǵady. 2026 jylǵy 1 qańtardan bastap talaptardy oryndamaǵan bazarlardyń qyzmeti ýaqytsha toqtatylady.