Almatyda ótip jatqan Inklúzıvti bilim berý salasyndaǵy alǵashqy Dúnıejúzilik kongres (World Inclusion Congress – WIC 2025) aıasynda «Inklúzıvti bilim berý jónindegi» Almaty deklarasıasy talqylandy, dep habarlaıdy aqshamnews.kz
Bul týraly QR Oqý-aǵartý mınıstrliginiń baspasóz qyzmeti habarlady.
«Bul deklarasıa – adamı kapıtaldy damytý, áleýmettik birlikti nyǵaıtý jáne zamanaýı tehnologıalar arqyly jańa múmkindikter ashý úshin naqty baǵdar. Qazaqstan tarapynan usynylǵan deklarasıa ár balanyń áleýetin tolyq ashýǵa baǵyttalǵan. Biz «Bilim – barshaǵa» qaǵıdaty aıasynda ınklúzıvti bilim berýdi qajet etetin tulǵalardyń sapaly jáne teń qoljetimdi bilim alýyn qamtamasyz etetinine senemiz. Inklúzıvti bilim berý – bizdiń qundylyqtarymyzdyń jáne bolashaqqa qurylǵan senimimizdiń aınasy. Ol ádiletti, qamqor jáne barshaǵa ashyq memlekettiń negizi bolyp tabylady», – dedi Qazaqstan Respýblıkasynyń Oqý-aǵartý mınıstri Juldyz Súleımenova.
Almaty deklarasıasynda ulttyq úkimetterge, bilim berý uıymdaryna jáne halyqaralyq qaýymdastyqqa arnalǵan usynystar qamtylǵan. Olardyń qatarynda:
•bilim almasý jáne tájirıbe taratý platformalaryn qurý;
•birlesken jobalardy damytý jáne qoldaý;
•damýshy elderge kómek kórsetýdi keńeıtý;
•ártúrli salalar arasyndaǵy seriktestikti nyǵaıtý;
•korporatıvtik jáne halyqaralyq uıymdardy tartý;
•ınklúzıvti bilim berý boıynsha monıtorıń pen esep berý mehanızmderin engizý bar.
Almaty deklarasıasy qatysýshylardyń qoldaýymen bir aýyzdan maquldandy. Ol Kongres ustanymyn beıneleıtin qujat retinde IýNESKO-ǵa joldanady jáne ınklúzıvti bilim berýdi damytý boıynsha elderdiń saıasattaryn qalyptastyrýda paıdalaný úshin qatysýshy memleketter arasynda taratylady.
Bul Qazaqstannyń ınklúzıvti bilim berýdi jahandyq deńgeıde ilgeriletýge qosqan mańyzdy úlesi. Ol halyqaralyq yntymaqtastyqty nyǵaıtýǵa, jańa seriktestikter ornatýǵa jáne árbir balanyń áleýetin ashýǵa baǵyttalǵan biregeı bastama bolyp tabylady.