Almaty qalasynda ınklúzıvti bilim berý salasyndaǵy alǵashqy Dúnıejúzilik kongres aıasynda «Inklúzıvti bilim berýdegi jahandyq trendter: syn-qaterler men sheshimder» taqyrybynda dóńgelek ústel ótti, dep habarlaıdy aqshamnews.kz
Oǵan Qazaqstan Respýblıkasynyń Qazaqstan Respýblıkasynyń Oqý-aǵartý mınıstri Juldyz Súleımenova, Tájikstan Respýblıkasynyń bilim berý jáne ǵylym mınıstri Saıdzoda Rahım Hamro, Parlament Májilisiniń depýtattary, Almaty qalasynyń ákiminiń orynbasary jáne halyqaralyq sarapshylary, memlekettik jáne qoǵamdyq uıym ókilderi qatysty.
Álemniń túkpir-túkpirinen kelgen bedeldi ǵalymdar men sarapshylar, pedagog-praktıkter, qoǵamdyq jáne halyqaralyq uıymdardyń ókilderi, sondaı-aq ár eldiń úkimet músheleri ınklúzıa salasyndaǵy jahandyq mańyzy zor máselelerdi birlesip talqylady.
Dóńgelek ústelde sóz alǵan Qazaqstannyń Oqý-aǵartý mınıstri Juldyz Súleımenova Qazaqstannyń bilim berý júıesinde Memleket basshysy Qasym-Jomart Toqaevtyń bastamasymen ádiletti qoǵam qurý baǵytynda aýqymdy reformalar júzege asyrylyp jatqanyn atap ótti. Atap aıtqanda, teń ári sapaly bilimmen qamtamasyz etý, zańnamalyq bazany jetildirý, ınfraqurylymdy damytý, ınklúzıvti mádenıetti qalyptastyrý jáne muǵalimderdiń kásibı damýyna basymdyq berý baǵyttaryna erekshe kóńil bólinýde.
«Qazaqstanda jasandy ıntellektini paıdalaný jáne erekshe bilim berý qajettilikteri bar balalardy jan-jaqty qoldaý máseleleri basty nazarda. Inklúzıanyń negizi – adamı qundylyqtar: syılastyq, qabyldaý jáne qoldaý. Biz zamanaýı syn-qaterler men jahandyq úrdisterdi eskere otyryp, bilim mazmunyn jetildirýde kúsh biriktirip, tıimdi strategıalar ázirleý, tájirıbe almasý jáne qoldaý mehanızmderin nyǵaıtýǵa shaqyramyz», – dedi Oqý-aǵartý mınıstri.
Sonymen qatar jıynda Tájikstan Respýblıkasynyń bilim berý jáne ǵylym mınıstri Saıdzoda Rahım Hamro Tájikstandaǵy ınklúzıanyń damý tájirıbesimen bólisti, SEAMEO Secretariat dırektory Datýk Habıba Abdýl Rahım Ońtústik-SHyǵys Azıa elderiniń tájirıbesi men yntymaqtastyǵy týraly aıtty, Almatydaǵy UNESCO Regional Bureau dırektory Amır Pırıch ınklúzıvti jáne ádil bilim berýdi ilgeriletýdegi IýNESKO-nyń rólin atap ótti, UNICEF óńirlik keńesshisi Nora Shabanı Eýropa men Ortalyq Azıadaǵy ınklúzıvti bilim berýdiń damýyna sholý jasady, International Forum of Inclusion Practitioners (IFIP) prezıdenti Danıel Sobel ınklúzıanyń jahandyq tájirıbeleri men mektepterdi qoldaý tásilderi týraly pikir bildirdi, Marokko Bilim mınıstrliginiń ókili Lýbna Belabbes bilim berýdiń qoljetimdiligin qamtamasyz etý jónindegi ulttyq sharalar týraly baıandady, Ázerbaıjannyń Mektepke deıingi jáne jalpy bilim berý jónindegi memlekettik agenttigi dırektorynyń orynbasary Iagýblý Vafa Mısırovna men Bosnıa jáne Gersegovına Federasıasynyń Saraevo kantonynyń Tárbıe jáne bilim berý máseleleri jónindegi mınıstrliginiń ókili Melıssa Mızdrak óz elderi men aımaqtarynyń tájirıbesin tanystyrdy, al Google for Education ókili Krıs Bleını ınklúzıvti bilim berýdi jahandyq deńgeıde qoldaýǵa arnalǵan tehnologıalyq sheshimderdi usyndy; sondaı-aq áıgili sáýletshi, Fuji Kindergarten jobasynyń avtory Tahakýra Tedzýka óz ıdeıalary men tájirıbesin ortaǵa saldy.