Almatyda jasandy ıntellekt negizindegi beınemonıtorıng jáne analıtıkalyq júıeler qarqyndy damyp keledi. Bul qala turǵyndarynyń qaýipsizdigi men jaılylyǵyn arttyrýǵa múmkindik beredi. Bul týraly Almaty qalasy Sıfrlandyrý basqarmasy basshysynyń orynbasary Meıram Dúsúkov Óńirlik komýnıkasıalar qyzmetinde ótken baspasóz konferensıasynda málimdedi.
«Qazirgi ýaqytta Almatyda 45 myń beınebaqylaý kamerasy jumys istep tur. Kelesi jyly olardyń sany 70 myńǵa deıin artady. Bul qaladaǵy qoǵamdyq qaýipsizdikti baqylaý tıimdiligin edáýir jaqsartady», – dedi spıker.
Qalalyq beınemonıtorıng júıesi adamdar kóp shoǵyrlanǵan oryndardy anyqtap qana qoımaı, anytqalǵan adamdardyń minez-qulqyn taldaıdy, sondaı-aq tóbelester men kúdikti zattardy tirkeıdi, qoǵamdyq oryndarda qarýdy tanyp, qoǵamdyq tártip buzýshylyqtardy, órtter men tútindenýdi anyqtaý múmkindikterine ıe.
«Kelesi jyly biz jańa fýnksıalardy engizýdi josparlap otyrmyz. Onyń ishinde: zańsyz qoqys úıindilerin anyqtaý, qoǵamdyq kólikterdi baqylaý jáne qańǵybas janýarlardy anyqtaý júıeleri bar», – dep atap ótti Dúsúkov.
Taǵy bir mańyzdy jańashyldyq – Cell Broadcast tehnologıasyn qoldaný arqyly jedel eskertý júıesiniń engizilýi.
Bul tehnologıa mobıldi jelilerge shamadan tys júkteme túsirmeı, azamattarǵa shuǵyl habarlamalardy jyldam jetkizýge múmkindik beredi.
«Synaq barysynda júıe uıaly operatorlardyń 47 myń bazalyq stansıa sektorlaryn óńdep, 99,6% sátti habar taratý kórsetkishine qol jetkizdi», – dedi Dúsúkov.