Almatyda 150 myńnan astam mektep oqýshysy CodiPlay bilim berý platformasynyń kómegimen smartfon arqyly programmalaý tilderin meńgerýde.
Bul týraly CodiPlay kompanıasynyń Qazaqstandaǵy keńsesiniń dırektory Alıar Kadıkenov Almaty qalasynyń Óńirlik komýnıkasıalar qyzmetiniń baspasóz konferensıasynda málimdedi, dep habarlaıdy aqshamnews.kz.
Onyń aıtýynsha, joba qaladaǵy 117 mektepti qamtyp, jastardyń sıfrlyq tehnologıalarǵa degen qyzyǵýshylyǵynyń artyp kele jatqanyn kórsetýde. Oqýshylar 1-synyptan bastap óz betimen «shlagbaým» jáne «jol baǵdarshamy» syndy jobalardy jasap, óz eńbekteriniń nátıjesin ınteraktıvti qurylǵylar túrinde baqylaı alady.
CodiPlay – 2021 jyly qurylǵan qazaqstandyq bilim berý platformasy. Búginde bul joba Qazaqstanmen qatar, shetelde de tanymal bolyp, álem boıynsha 1 mıllıonnan astam qoldanýshyny qamtyp otyr. Platforma Ulybrıtanıa, Ońtústik Koreıa, Túrkıa jáne Birikken Arab Ámirlikteri mektepteriniń oqý baǵdarlamasyna engizilgen. 2024 jyly Qazaqstannyń Premer-mınıstri Oljas Bektenov Oqý-aǵartý mınıstrligi men jergilikti atqarýshy organdarǵa CodiPlay jobasyn mektepterde keńinen engizý týraly tapsyrma berdi. Bul bastama oqýshylardyń sıfrlyq daǵdylaryn tıimdi túrde damytýǵa baǵyttalǵan.
Alıar Kadıkenovtiń aıtýynsha, CodiPlay platformasynda oqıtyn almatylyq oqýshylardyń sıfrlyq saýattylyq deńgeıi aıtarlyqtaı joǵary.
«Balalar sıfrlyq ortaǵa tez beıimdelip, platformanyń ınterfeısin ońaı meńgeredi jáne programmalaýǵa qyzyǵýshylyq tanytady. CodiPlay: logıka men algorıtmderdiń negizderinen bastap, jeke jobalardy jasaýǵa deıin oqytýdyń qadamdyq júıesin usynady: . Bul árbir oqýshyǵa, onyń daıyndyq deńgeıine qaramastan, materıaldy sátti ıgerýge múmkindik beredi», – dedi ol.
Óz kezeginde, CodiPlay memlekettik qyzmettermen jumys jónindegi departamentiniń dırektory Nurǵalı Turymbetov jobanyń basty maqsaty IT-mamandaryn ǵana daıarlaý emes ekenin atap ótti. Jobanyń negizgi mindeti – balalardy sıfrlandyrý dáýirine beıimdeý, óıtkeni búgingi tańda sıfrlyq daǵdylar ómirdiń ajyramas bóligine aınalýda. Programmalaý – logıkalyq jáne kreatıvti oılaýdy, máseleni sheshý jáne tehnologıamen jumys isteý qabiletin damytatyn qural.
«Almaty oqýshylarynyń programmalaýǵa degen qyzyǵýshylyǵy joǵary jáne olar ártúrli. Bireýler úshin bul – óz ıdeıalaryn júzege asyrý múmkindigi, mysaly: oıyndar nemese anımasıalar jasaý. Al basqalary úshin – sıfrlyq álemniń qalaı jumys isteıtinin tereńirek túsinýdiń joly», – dedi Turymbetov.
Qazaqstan Prezıdenti qoıǵan jyl saıyn 1000 joǵary deńgeıli IT-maman daıarlaý mindeti aıasynda CodiPlay sıaqty EdTech jobalarynyń damýy erekshe mańyzǵa ıe bolyp otyr. Kompanıanyń pikirinshe, bilim berý tehnologıalar naryǵyndaǵy básekelestik sheshimderdiń sapasyn arttyrýǵa yqpal etedi.
«Bilim berý ónimderi neǵurlym kóp bolsa, básekelestik soǵurlym joǵary bolady, al bul óz kezeginde eń myqty jáne sapaly sheshimderdiń ómirsheńdigin qamtamasyz etedi», – dep atap ótti Turymbetov.
CodiPlay sapaly kontent pen tıimdi oqytý ádisterin ázirleýge basymdyq berip, oqýshylarǵa IT-negizderin úıretip qana qoımaı, olardy sıfrlyq álemde tabysty mansapqa daıyndaýǵa kómektesýde.