2024 jyldyń qorytyndysy boıynsha Almaty Qazaqstandaǵy IT-sektordyń damýy boıynsha kóshbasshy bolyp qala beredi.
Qala eldegi barlyq IT-qyzmetterdiń 52%-yn qamtamasyz etedi, dep habarlaıdy aqshamnews.kz.
Jalpy IT-naryqtyń kólemi 3089 mlrd teńgeni qurasa, onyń 1592 mlrd teńgesi Almatyǵa tıesili. Bul týraly Almaty qalasy sıfrlandyrý basqarmasy basshysynyń orynbasary Meıram Dúsúkov Óńirlik komýnıkasıalar qyzmetinde ótken baspasóz konferensıasynda málimdedi.
2022 jyly «Almaty qalasynyń 2025 jylǵa deıingi damý baǵdarlamasy» bekitilgen bolatyn. Onyń negizgi baǵyttarynyń biri – “Smart City” (Aqyldy qala) konsepsıasy. Osy baǵdarlamanyń aıasynda startaptar men tehnologıalyq jobalar belsendi túrde qoldaý tabýda.
«Biz búginge deıin úlken nátıjelerge qol jetkizdik. 2024 jyly 7 myńnan astam adam akselerasıalyq baǵdarlamalarǵa qatysty, 2 myńnan astam jańa jumys orny ashyldy, al tartylǵan ınvestısıa kólemi 13,2 mıllıon AQSH dollaryn qurady»– dep atap ótti Dúsúkov.
Almatyda tehnologıalyq kásipkerlik ekojúıesin damytý jumystary jalǵasýda. Qalada ınovasıalyq ıdeıalardy qoldaý men ınvestorlardy tartýǵa baǵyttalǵan “Smart City Accelerator”, “Almaty Innovation Challenge Hackathon” jáne “Startup Weekend” syndy jobalar iske asyrylýda.
Sonymen qatar, qalada jasandy ıntellekt (AI) tehnologıalary engizilýde. II (AI) qalanyń jol qozǵalysyn taldaýǵa, azamattardyń ótinishterin óńdeýge jáne qalalyq ınfraqurylymdy basqarýǵa kómektesedi.