Bul týraly TAV Airports holdıńiniń prezıdenti habarlady.
Premer-mınıstr Álıhan Smaıylov pen TAV Airports holdıńiniń prezıdenti Serkan Kaptan avıasıa salasyndaǵy yntymaqtastyq jáne Qazaqstannyń kólik-logıstıkalyq áleýetin damytý máselelerin talqylady, dep habarlaıdy Almaty-akshamy.kz. Úkimet basshysynyń baspasóz qyzmetine silteme jasap.
Álıhan Smaıylov Túrkıa – Qazaqstannyń saýda-ekonomıka, ınvestısıa, sondaı-aq kólik salasyndaǵy negizgi seriktesteriniń biri ekenin atap ótti.
«Biz elimizdiń kólik-logıstıkalyq áleýetin arttyrýǵa úlken kóńil bólemiz. Búginde Úkimet aldynda Qazaqstannyń senimdi kontınenttik tranzıttik hab retindegi rólin kúsheıtý mindeti tur», - dedi ol.
Premer-mınıstr TAV Airports holdıńiniń Almatydaǵy jańa halyqaralyq termınal qurylysy boıynsha iri ınfraqurylymdyq jobany júzege asyrýǵa qatysýy mańyzdy dep atap ótti.
«Bul - Ortalyq Azıadaǵy eń iri áýejaılardyń biri ári strategıalyq mańyzy zor. Jańa termınal qurylysy jolaýshylar tasymalyn aıtarlyqtaı arttyryp, ushý geografıasyn keńeıtedi jáne megapolıs turǵyndary men qonaqtaryna joǵary deńgeıdegi jaıly qyzmet kórsetedi dep kútemiz», - dedi Premer-mınıstr.
Óz kezeginde Serkan Kaptan kompanıanyń Qazaqstandaǵy qyzmeti men óndiristik máseleleri jaıly, sonymen qatar elimizdegi basqa da jobalarǵa qatysýdy josparlap otyrǵanyn aıtty.
«Biz úshin Almaty áýejaıy mańyzdy jobalardyń biri, óıtkeni ol Ortalyq Azıanyń qaq ortasynda ornalasqan jáne qala úshin de, búkil Qazaqstan úshin de mańyzdy ról atqarady. Sondyqtan biz ony múmkindiginshe tezirek damytýǵa tyrysamyz. Jańa termınal keler jyly jumys isteı bastaıdy dep úmittenemiz», - dedi ol.
Kezdesý qorytyndysy boıynsha taraptar tıimdi yntymaqtastyqty odan ári nyǵaıtýǵa daıyn ekenin rastady.
Anyqtama: TAV Airports Holding kompanıasy - 1997 jyly Ystambuldaǵy Atatúrik áýejaıyn keńeıtý jáne modernızasıalaý maqsatynda qurylǵan jahandyq áýejaı operatory. Búginde kompanıa álemniń 8 elindegi 15 áýejaıdy basqarady, 2022 jyly osy áýejaılarda jalpy sany 78 mln jolaýshyǵa qyzmet kórsetilgen.