Almaty qalasynda halyqty aldap, jıhaz jasaımyn degen jeleýmen aqsha tapqan alaıaq ustaldy.
"Anti Fraud" jedel-izdestirý is-sharasy barysynda Medeý aýdandyq polısıa basqarmasynyń qyzmetkerleri 40 jastaǵy er adamnyń qýlyǵyn áshkereledi, dep habarlaıdy aqshamnews.kz Polisia.kz-ke silteme jasap.
Ol óz qyzmetin naryqtaǵy baǵadan áldeqaıda tómen usynyp, tapsyrysty qysqa merzimde oryndaıtynyn aıtyp, turǵyndardyń senimine kirgen. Alaıda ýáde etilgen jıhaz jasalmaı, klıentterdiń aqshasy da qaıtarylmaǵan.
— Qazirgi tańda onyń keminde 8 adamdy aldaǵany anyqtaldy. Jalpy shyǵyn kólemi shamamen 5 mıllıon teńgeni quraıdy. Degenmen jábirlenýshiler sany budan da kóp bolýy múmkin. Óıtkeni keıbir azamattar túrli sebeptermen polısıaǵa aryzdanbaǵan bolýy yqtımal. Qalaı bolǵanda da atalǵan derek boıynsha sotqa deıingi tergeý bastaldy. Ustalǵan azamat qamaýǵa alyndy. Aıta ketý kerek, ol qurbandaryn negizinen ınternet arqyly tapqan, — deıdi Medeý aýdandyq polısıa basqarmasynyń bastyǵy İlıas Ómirserikov.
Almaty qalalyq polısıa departamenti azamattardy saq bolýǵa, taýar nemese qyzmet úshin aldyn ala tólem jasaýdan buryn, satýshynyń senimdiligine kóz jetkizýge shaqyrady. Eger siz osyndaı alaıaqtyq áreketterdiń qurbany bolsańyz, dereý polısıaǵa habarlasyńyz.