Osy aptada qalamyzda bolǵan mańyzdy jańalyqtarǵa sholý.
Almaty – Beıjiń
Qytaı Halyq Respýblıkasyna jumys sapary aıasynda Almaty ákimi Erbolat Dosaev Beıjiń qalalyq josparlaý ortalyǵyna - qazirgi zamanǵy qala qurylysy jáne qalany damytý qaǵıdattaryn kórsetetin biregeı mekemege bardy. Shahar basshysy ekologıa, qala qurylysy máselelerimen, Beıjińniń 2016-2035 jyldarǵa arnalǵan Bas josparynyń qalalyq aýmaqtardy ıgerýge jáne olardy biryńǵaı aglomerasıaǵa ıntegrasıalaýǵa júıeli kózqarasty kórsetetin negizgi aspektilerimen tanysty.
«Beıjińdegi qala qurylysy ortalyǵy jaı ǵana kórme emes, bul jahandyq úderisterge saı qalanyń qalaı damıtyny týraly jandy kórinis. Biz qalamyzdyń turaqty damýyn qamtamasyz ete otyryp, úzdik tájirıbeler men ıdeıalardy Almatyda qoldanýǵa múddelimiz», - dep atap ótti Erbolat Dosaev.
Aspany ortaq...
Almaty men Qytaıdyń iri qalalary arasyndaǵy áýe qatynasyn keńeıtý, sondaı-aq týrısik jáne iskerlik baılanystardy nyǵaıtý máselesi Almaty ákimi Erbolat Dosaev pen Air China Limited áýe kompanıasynyń tóraǵasy, China National Aviation Holding Company prezıdenti Ma Chonsán myrzamen kezdesý barysynda talqylandy.
Qytaı – Almaty týrızmin damytýdaǵy negizgi maqsatty naryqtyń biri. 2024 jyl Qytaıdaǵy Qazaqstan týrızmi jyly bolyp jarıalandy, al bıylǵy jyl – Qazaqstandaǵy Qytaı týrızmi jyly. Byltyr Almatyǵa Qytaıdan 95,3 myńnan astam týrıs keldi, bul 54%-ǵa ósim kórsetti. Jasalǵan kelisim aıasynda týrısik aǵynnyń qarqyndy damýy jalǵasady dep senemiz», – dedi Erbolat Dosaev.
«Sahara sandýǵashy»
Qazaq radıosynyń belgili dıktory, Qazaqstan mádenıetiniń damýyna eleýli úles qosqan kórnekti tulǵa Saýyq Jaqanovanyń 80 jyldyq mereıtoıyna oraı «Sahara sandýǵashy» kitabynyń tanystyrylymy ótti. Saýyq Jaqanova óziniń kóp jyldyq el mádenıetine sińirgen eńbegi úshin «Qurmet» ordenimen marapattaldy.
Burynǵydan da "Sergek"
Almatydaǵy "Sergek" beınebaqylaý júıesi endi kólikterdiń turaqqa qoıý erejelerin, onyń ishinde ekinshi qatarǵa kólik qoıý sıaqty buzýshylyqtardy da tirkeıtin bolady.
QR Ákimshilik quqyq buzýshylyq týraly kodeksiniń (ÁQbK) 597-babynyń 3-bóligine sáıkes, jol qozǵalysyna kedergi keltiretin kólik qoıý erejesin buzǵany úshin júrgizýshige 10 AEK mólsherinde aıyppul salynady. Bul shamamen 39 320 teńgeni quraıdy. Eger aıyppul 7 kún ishinde tólense, jeńildik qarastyrylyp, 5 AEK (19 660 teńge) mólsherinde tólenedi. Almaty qalalyq polısıa departamentiniń baspasóz qyzmeti júrgizýshilerdi jol erejelerin qatań saqtaýǵa jáne qaladaǵy kólik qozǵalysyn qaýipsiz ári yńǵaıly etýge shaqyrady.
«Sottan kelemiz...»
Almaty qalasynyń sottarynda dástúrli ótetin ashyq esik kúni bastaldy. Bul bastama sottar men qoǵam arasyndaǵy ózara is-qımyldy jaqsartýdaǵy mańyzdy qadam boldy. Jobaǵa qatysýshylar ózderiniń suraqtaryna jaýaptar men qajetti aqparattar aldy, sondaı-aq týyndaǵan máselelerin jedel sheshe aldy.
Dodaǵa túsken drondar
Qalamyzda Ortalyq Azıadaǵy eń iri halyqaralyq robototehnıka jáne drondar chempıonaty ótip jatyr. Bıylǵy robototehnıka chempıonatynyń taqyryby sý resýrstary men sýasty álemin zertteýdiń jahandyq máselesine arnalmaq. Komandalar AQSH-tyń Tehas shtaty, Húston qalasynda ótetin álemdik kezeńde el namysyn qorǵaý úshin baq synaıdy.
Belbeý ketse de, bel ketpesin
Shahardaǵy Arena sport kesheninde (Nurkent shaǵyn aýdany, 14B) Qazaqstan Respýblıkasynyń jasóspirimder men jastar arasyndaǵy U17 jáne U20 sanatyndaǵy grek-rım, erkin jáne áıelder kúresi boıynsha chempıonat bastaldy.
Atalǵan birinshilikke elimizdiń 17 oblysynan, sondaı-aq Astana, Almaty jáne Shymkent qalalarynan eń úzdik jas balýandar qatysady. Olar Qazaqstan chempıony ataǵy úshin jáne bıylǵy kúntizbelik jylǵa josparlanǵan halyqaralyq jarystarda – Azıa jáne álem chempıonattarynda ulttyq qurama sapynda el namysyn qorǵaý múmkindigi úshin kúresedi.
Mopediń tirkelgen be?
Almatynyń ákimshilik polısıasy mopedti tirkeý naýqany bastalǵaly beri myńnan astam moped qoldanýshysynyń bul prosedýrany oryndaǵanyn habarlady.
Moped júrgizýshileriniń A1 júrgizýshi sanaty bolýy kerek. 5 sáýirden bastap mopedterdi mehanıkalyq kólikterge teńestiretin zańnamalyq túzetýler kúshine enedi. Osy kúnnen bastap mopedterdi polısıada tirkelgennen keıin jáne tıisti júrgizýshi kýáligi bolǵannan keıin ǵana paıdalanýǵa ruqsat etiledi.
«Ańsaǵan Sábı»
Sońǵy tórt jylda «Ańsaǵan Sábı» baǵdarlamasy aıasynda 28 myń EKO sharasy jasalyp, sonyń arqasynda 10 myńnan astam bala dúnıege keldi. Almatyda bul baǵdarlama 562 áıeldi qamtysa, onyń 246-sy ana atandy. Almatyda jáne Qazaqstanda EKO baǵdarlamalarynyń sany turaqty túrde ósip keledi, buǵan memlekettik qoldaý jáne halyqty aqparattandyrýdyń joǵarylaýy yqpal etýde.
Almatynyń aýasy
Qalanyń ekologıalyq jaǵdaıyn jaqsartý – jyldar boıy kóterilip kele jatqan ózekti másele. Almaty máslıhatynyń depýtaty Beıbit Alsenbetovtiń aıtýynsha, Almatynyń ekologıalyq ahýalyn jaqsartý úshin jańa, turaqty mehanızmder qajet. Ol úshin kelesi qadamdar usynylady:
Jeke sektordy tartý. Memlekettik jáne kvazımemlekettik qurylymdar qurýdyń ornyna memlekettik-jekemenshik áriptestik (GCHP) tetikterin paıdalaný kerek.
Qoǵamnyń belsendi qatysýy. Sarapshylar, bıznes ókilderi jáne qala turǵyndary steıkholderler retinde ekologıalyq bastamalarǵa aralasýy qajet.
Turaqty baqylaý júıesin qurý. Bir rettik baǵdarlamalar emes, úzdiksiz jumys isteıtin monıtorıń júıesin engizý kerek.
Aıyppuldan rekord
Byltyr Almaty qalasynda salynǵan ákimshilik aıyppuldardyń jalpy somasy 60,1 mıllıard teńgege jetip, Qazaqstan boıynsha eń joǵary kórsetkish tirkeldi. Sarapshylardyń aıtýynsha, jol qozǵalysy erejelerin buzý aıyppuldardyń negizgi bóligin quraıdy.
Sońǵy jyldary aıyppul kóleminiń ósýine birneshe faktor áser etti:
Jol qozǵalysy erejeleriniń jıi buzylýy – Almatyda kólik sany óte kóp, bul jol erejelerin buzatyn júrgizýshilerdiń de artýyna sebep bolyp otyr.
Quqyqbuzýshylyqtardyń avtomatty túrde tirkelýi – Joldaǵy beınebaqylaý kameralary men avtomattandyrylǵan júıeler arqyly aıyppuldar kóptep jazylady.
Ekologıalyq talaptardyń kúsheıýi – Almatyda aýanyń lastanýyna qatysty ekologıalyq aıyppuldar da ósýde.