Almaty qalasynda iskerlik ortada jylsaıynǵy basty oqıǵalardyń biri – Women in Business halyqaralyq forýmy ótti.
Bir alańǵa bıznes-qoǵamdastyqtyń tabysty, tanymal spıkerleri men kásipkerler jınaldy. Qonaqtarǵa tıimdi netvork, sapaly kontent, biregeı keıster men iskerlik ortadaǵy eń ózekti aqparat usynyldy, dep habarlaıdy Almaty-akshamy.kz.
Almaty qalasynyń İsker áıelder keńesi, Halyk Bank jáne Mastersard uıymdastyrǵan forým jumysyna 300-den asa tabysty áıel kásipkerler, qoǵam qaıratkerleri, damý ınstıtýttary, iri kompanıalar, bankterdiń basshylary qatysty.
«Búgin bir alańǵa bıznestiń túrli salalaryndaǵy tabysty kásipker áıelder jınaldy. Forým jyl saıyn ótedi. Biz isker jáne jańadan kásibin bastaǵan áıel kásipkerler úshin mazmundy jáne paıdaly baǵdarlamany usyndyq. Ár sesıa – belgili bir taqyryptyń jeke blogy, onda sarapshylar pikir bólisip, tabysty kásipkerler tájirıbesi týraly aıtady. Jyldan jylǵa forýmnyń aıasy keńeıip, oǵan jaqyn jáne alys shetelden qonaqtar, spıkerler qatysyp jatyr», – dep atap ótti forýmdy uıymdastyrýshy, Almaty qalasynyń isker áıelder keńesiniń tóraıymy Aqerkin Eralıeva.
QHR Bas konsýly Szán Veı áıelderdiń quqyǵy men múmkindikterin keńeıtý – jahandyq turaqty damý maqsatyndaǵy mańyzdy másele ekenin atap ótti.
«Bul forýmdy qazirgi kúrdeli jahandyq ahýal aıasynda ótkizý, áıelderdiń múmkindikterin keńeıtý sıaqty taqyryptar boıynsha pikir almasý jáne talqylaý mańyzdy praktıkalyq mánge ıe jáne ýaqyttyń aıryqsha erekshelikterin kórsetedi», – dedi Szán Veı óz sózinde.
«Damý» qorynyń basqarma tóraıymy Gaýhar Bóribaeva áıelder kásipkerligin memlekettik qoldaý týraly aıtty.
«Úkimet Qazaqstandaǵy shaǵyn jáne orta kásipkerlikti damytýǵa úlken kóńil bóledi. Sonyń ishinde áıelder kásipkerligin damytý bar. Áıel kásipkerlerdiń jobalary «Damý» qory qoldaǵan jobalardyń jalpy sanynyń 47%-yn quraıdy. Qor qyzmetiniń barlyq kezeńinde áıelder kásipkerliginde 2 893 mlrd teńge somasyna 96 myń joba qoldaý tapty. Qazirgi kezde kásipker áıelder óz bıznes-ıdeıalaryn iske asyrý, kompanıalardy damytý jáne jańa jumys oryndaryn qurý úshin memlekettik qoldaýdy tıimdi paıdalanatyny qýantady», – dep atap ótti «Damý» qorynyń basqarma tóraıymy GaýHar Bóribaeva.
«Damý» qorynyń málimetinshe, kásipker áıelder kóbine qyzmet kórsetý, aýyl sharýashylyǵy jáne óńdeý ónerkásibi salasynda jumys isteıdi.
AQSH-tyń bas konsýly Mıshel Erkin áıelderdiń qoǵam, ekonomıkanyń órkendeýindegi rólin atap ótti.
«Áıelderdiń ekonomıkalyq múmkindikterin keńeıtý – jalpy órkendeýdi qamtamasyz etýdiń kilti. Sondyqtan biz áıelder úshin laıyqty aqy tólenetin, sapaly jumys oryndaryn qurý arqyly ekonomıkalyq básekege qabilettilikti arttyrý maqsatynda Qazaqstanmen yntymaqtasýǵa nıettimiz», – dedi AQSH-tyń Bas konsýly Mıshel Erkin.
Dasco Consulting Group basqarýshy dırektory Dármen Sádýaqasov saýda salasyndaǵy áıelderdiń róli týraly aıtty. Dasco Consulting Group málimetteri boıynsha, eldegi árbir besinshi jumys isteıtin áıel saýda salasynda qyzmet etedi. Saýdadaǵy áıelderdiń 15%-dan astamy Almaty qalasyna tıesili.
«Almaty qalasy saýdamen aınalysatyn áıelder sany boıynsha kósh bastap tur. Biraq olardyń úlesi nebári 52%-dy quraıdy. Ulytaý jáne Qostanaı oblystarynda saýda sektorynda jumyspen qamtylǵandardyń 67%-yy áıelderge tıesili. Saýdadaǵy áıelderdiń eń az úlesi Túrkistan oblysynda qalasynda, onda kórsetkish 47%-dy qurady», – deıdi Dármen Sádýaqasov.
Spıker jalpy ekonomıkaǵa qaraǵanda saýda sektorynda joǵary bilimi bar áıelderdiń úlesi áldeqaıda joǵary ekenin atap ótti.
«Joǵary jáne joǵary oqý ornynan keıingi bilimi bar jumyspen qamtylǵan áıelderdiń úlesi ekonomıkada 38%-dy, al saýda sektorynda 49%-dy quraıdy. Kerisinshe, saýdada tehnıkalyq jáne kásiptik bilimi bar jumyspen qamtylǵan áıelderdiń úlesi 45%, al Qazaqstanda jalpy – 56%-dy quraıdy», – dep tolyqtyrdy spıker.
Forýmda áleýmettik kásipkerlik jáne qaıyrymdylyq taqyrybyna jeke sesıa arnaldy. Almaty qalasy İsker áıelder keńesiniń tóraıymy Aqerkin Eralıeva áleýmettik kásipkerlikti óz bıznesin damytýǵa jáne qalalar men aýyldardyń damýyna eleýli úles qosýǵa umtylatyn adamdar qalyptastyratynyn aıtty.
Mysaly, Halyk qory Qazaqstanda ómir súrý sapasyn jaqsartý jáne damytý úshin qolaıly ortany qamtamasyz etýmen aınalysady. Qor jyl saıyn óńirlerdegi áleýmettik jobalarǵa mıllıardtaǵan teńge bóledi. Al Ayala qory 2010 jyldan bastap eldegi balalar óliminiń kórsetkishin eki esege tómendetýge kómektesti jáne osylaısha BUU-nyń turaqty damýynyń 17 maqsatynyń birine («densaýlyq pen ál-aýqat») qol jetkizý prosesine qatysty.
«Qazaqstanda qaıyrymdylyqpen aınalysatyn 23 myńnan astam úkimettik emes uıym tirkelgen. Halyk qory retinde biz basqa qorlarmen birlesip, osy mańyzdy saladaǵy úles pen tıimdilikti kúsheıtý úshin usynystar berýge daıynbyz. Sodan keıin osy usynystardy odan ári jetildirý maqsatynda ýákiletti memlekettik organǵa joldaımyz», – dedi Halyk qorynyń dırektory Narıman Ábilshaıyqov.
«Áıelderdiń lıderlik jasampaz prınsıpi kóptegen jyl boıy Qazaqstannyń ekonomıkasy men qoǵamynyń túrli aspektilerin belsendi túrde ózgertip keledi. İri qazaqstandyq qaıyrymdylyq uıymdaryn áıelder basqaryp otyr. Olar óz bıznesin qatar damytyp, memleketke ózekti áleýmettik máselelerdi sheshýge kómektesip júr», – dep atap ótti Ayala qaıyrymdylyq qorynyń negizin qalaýshy jáne prezıdenti Aıdana Súleımenova.
Forýmnyń negizgi taqyryptary: áıelderdiń quqyǵy men múmkindikterin keńeıtýdegi halyqaralyq trendter, ekonomıka jáne qarjy máseleleri, áleýmettik jaýapkershilik, áıelder kásipkerligin qoldaý sharalary.
Women in Business– kásipker áıelderge arnalǵan dıalog alańy. Onda bıznes-orta, sonyń ishinde áıelder kásipkerligi, ekonomıkalyq saıasat, salalyq mamandandyrýdy damytýdyń anaǵurlym túıtkildi taqyryptary talqylanatyn bolady.
Forým jumysyna «Halyk Bank» AQ basqarma tóraıymy Úmit Shaıahmetova, Qazaqstandaǵy BUU Turaqty úılestirýshisi Mıkaela Frıberg-Storı, AQSH Bas konsýly Mıshel Erkin, QHR Bas konsýly Szán Veı, IFC Qazaqstan ókildiginiń basshysy Ekaterına Bendjamın, «Damý» kásipkerlikti damytý qorynyń basqarma tóraıymy Gaýhar Bóribaeva, Eýrazıa aımaǵynda Strategy seriktesi PwC konsýltasıalyq praktıkasynyń kóshbasshysy Natalá Lım, Qazaqstandyq baspasóz klýbynyń prezıdenti Ásel Qaraýylova jáne basqa spıkerler qatysty.
Forým aıasynda qatysýshylar elimizdiń tabysty áıelder jáne kásipkerlerimen qarym-qatynas jasaý, tájirıbe almasy múmkindigine ıe boldy.