Roza Baǵlanova atyndaǵy «Qazaqkonsert» memlekettik akademıalyq konserttik uıymy «Gúlder» ansambliniń ártisi Aqqanat Smaǵulova 2024 jyldyń 20 aqpanynda Germanıada ótken «TANZOLYMP» bedeldi halyqaralyq horeografıalyq baıqaýynyń altyn medaline ıe boldy.
Bul týraly Mádenıet jáne aqparat mınıstrliginiń baspasóz qyzmeti málim etti, dep habarlaıdy Almaty-akshamy.kz.
Óner dodasynda Aqqanat Anvara Sadyqova qoıǵan «Aqqý» jáne Almat Shamshıev qoıǵan «Erke bala» atty eki bı nómirin usyndy. ⠀
800-den astam ónerpaz baq synaǵan baıqaýda 34 qatysýshy irikteýden ótip, Gala-konsertte óner kórsetti. Aıta ketý kerek, Aqqanat - Gala-konsertte «Halyq bıi» nomınasıasy boıynsha óner kórsetýge múmkindik alǵan jalǵyz ónerpaz. ⠀
«TANZOLYMP» festıvál-baıqaýy jyl saıyn ótkiziletin bedeldi horeografıalyq baıqaýlardyń biri. Baıqaý baǵdarlamasyn mádenıet jáne óner qaıratkerleri men kásibı bı oqytýshylary baǵalaıdy.