Byltyr qarasha aıynan bastap iske qosylǵan Neo Nomad vızasyn taǵy bes sheteldik azamat aldy. Onyń úsheýi - AQSH, bireýi Ulybrıtanıa jáne taǵy bireýi Latvıa azamaty, dep habarlaıdy aqshamnews.kz
Neo Nomad vızasy sheteldik azamattarǵa Qazaqstanda bir jylǵa deıin turýǵa múmkindik beredi. Bul rette olar sheteldegi kompanıalarda qashyqtan jumys isteı alady. Vıza IT, marketıń, qarjy, dızaın jáne konsaltıń salalaryndaǵy jumysyn saıahatpen ushtastyratyn zamanaýı kóshpendilerge arnalǵan. Ol úshin sheteldik azamattar Qazaqstan Respýblıkasynyń sheteldegi elshilikterine birneshe qujat tapsyrý qajet:
- Keıingi 6 aıdaǵy bank shotynan úzindi kóshirme, aı saıynǵy tabysy 3 000 AQSH dollarynan joǵary ekenin rastaıtyn qujat
- Azamattyǵy bar eldiń ýákiletti organy bergen salyq deklarasıasy
- Azamattyǵy nemese turaqty mekenjaıy bar eldiń organy bergen sottalmaǵany týraly anyqtama
- Vızanyń qoldanylý merzimine deıin jaramdy medısınalyq saqtandyrý
- Qazaqstandaǵy týrısik kompanıalardan shaqyrý (48 eldiń azamaty úshin talap etilmeıdi)
Esterińizge sala keteıik, buǵan deıin Neo Nomad vızasyn úsh sheteldik týrıs alǵan edi. Vızany birinshi bolyp energetıka salasynda jumys isteıtin Ulybrıtanıa azamaty ıelendi. Sondaı-aq vızalar Ońtústik Koreıa jáne Sıngapýr azamattaryna berildi.