Almatynyń 182 mektebinde ınklúzıvti bilim berý júzege asyrylýda.
Almaty qalasy bilim basqarmasynyń basshysy Lázzat Jylqybaevanyń aıtýynsha, erekshe bilim berý qajettilikteri bar balalardy qamtý jyl saıyn artyp keledi, dep habarlaıdy Almaty-akshamy.kz
“Almaty qalasynda ınklúzıvti bilim berýdi júzege asyratyn mektepter sany jyl saıyn artyp keledi. Qazirgi ýaqytta qalada 182 mektepte erekshe bilim berý qajettiligi bar balalarǵa jaǵdaı jasalǵan (85%). 2023-2024 oqý jylynyń basynda qosymsha 16 mektepte ınklúzıvti bilim berýdi iske asyrý josparlanýda (198 mektep, bul mektepterdiń jalpy sanynyń 92% quraıdy)”, - dep habarlady basqarma basshysy.
Spıkerdiń aıtýynsha, eger 2020-2021 oqý jylynda ınklúzıvti bilim berýmen 3 672 bala qamtylsa, 2022-2023 oqý jylynda 4 632 bala qamtylǵan.
“Qalanyń 185 mektebinde erekshe bilim berý qajettilikteri bar balalardy qoldaý boıynsha kabınetter jumys isteıdi, olardyń 8-i aýdandardyń tirek mektepteri bolyp tabylady (№82, 75, 116, 63, 87, 64, 174, 74), jáne erekshe bilim berý qajettilikteri bar balalarmen jumys isteıtin muǵalimderge ádistemelik kómek kórsetedi”, - dedi ol.
Sonymen qatar, bilim berýdegi jańa tehnologıalardyń qalalyq ǵylymı–ádistemelik ortalyǵynyń bazasynda ınklúzıvti resýrstyq ortalyq (IRO) ashyldy. Sondaı-aq, ınklúzıvti bilim berýdi iske asyratyn jalpy bilim beretin mektepterdiń 600 pedagogynyń biliktiligin arttyrý kýrstaryn ótkizý josparlanýda.
“Qazirgi ýaqytta múmkindigi shekteýli balalarǵa arnaıy psıhologıalyq-pedagogıkalyq qoldaý kórsetetin jeke uıymdarda memlekettik bilim berý tapsyrysyn ornalastyrýǵa konkýrs jarıalandy”, - dep atap ótti sóz sońynda spıker.