QR Ǵylym jáne joǵary bilim mınıstrliginiń qoldaýymen Ǵylym qory hımıa salasyndaǵy ǵylymı jobalardyń tusaýkeserin uıymdastyryp, ál-Farabı atyndaǵy Qazaq ulttyq ýnıversıtetinde ǵalymdar men ınvestorlar jáne kásipkerler bas qosty.
«Hımıa ónerkásibi boıynsha tehnologıalardy komersıalandyrý reaktory» dıalog alańynda qatysýshylar ǵylymı jobalardy engizý jáne ınovasıalardy komersıalandyrý máselelerin ortaǵa saldy, dep habarlaıdy aqshamnews.kz Ǵylym jáne joǵary bilim mınıstrligine silteme jasap.
Aýqymdy kezdesýge QR ǴJBM Ǵylym komıtetiniń tóraǵasy Ǵalymjan Janqýatov, «Ǵylym qory» AQ Basqarma tóraǵasy Kamıl Aqatov, ál-Farabı atyndaǵy QazUÝ Basqarma tóraǵasynyń orynbasary – birinshi prorektor Erkin Dúısenov, Almaty, Atyraý, Qaraǵandy jáne ózge de óńirlerdegi ýnıversıtet ǵalymdary, tanymal bıznesmender qatysty.
Kezdesý maqsaty – bıznes ókilderin ýnıversıtet ǵalymdary ázirlegen ınovasıalyq jobalarmen tanystyrý, ǵylym men bıznesti biriktirý, ǵylymı jobalardy naryqqa shyǵarý, komersıalandyrý baǵytyndaǵy túıtkildi máselelerdi qarastyrý.
Jalpy, ǵylymı ınovasıalardy engizý úshin berik seriktestik qura otyryp, ǵylym men bıznesti tıimdi biriktiretin komersıalandyrý reaktory aıasynda ótken sharalar qorytyndysy boıynsha 14-ten astam ǵylymı joba qarjylandyrýǵa ıe boldy.
Solardyń biri, komersıalandyrý reaktorynda usynylǵan ósimdik maıyn regenerasıalaý jónindegi joba qarjylandyrýdy alyp, bıznes pen S. Seıfýllın atyndaǵy Qazaq agrotehnıkalyq ýnıversıtetiniń ǵalymdarymen seriktestikte jańa óndiristi iske qosty. Ósimdik maıyn óńdeıtin jańa seh ǵylym men bıznestiń tabysty yntymaqtastyǵynyń nátıjesi boldy.
Jıynda QR ǴJBM Ǵylym komıtetiniń tóraǵasy Ǵalymjan Janqýatov dıalog alańy perspektıvalyq mámileler jasasýǵa jáne jobalardy komersıalandyrý jumystaryn júzege asyrýǵa múmkindik beretinin atap ótti.
Óz kezeginde QazUÝ-dyń prorektory Erkin Dúısenov sóz sóılep, búginde JOO aldynda ǵylymdy basqarý sapasyn jaqsartý, ýnıversıtet ǵylymyn damytý, ǵylymı qyzmetkerler sanyn kóbeıtý mindeti turǵanyn aıtty.
«Ǵylym qory» AQ Basqarma Tóraǵasy Kamıl Aqatov júrgizilgen jumystardyń nátıjelerimen bólisti.
İs-shara barysynda ǵalymdar ınvestorlarǵa ǵylymı ázerlemelerin tanystyrdy. Atap aıtqanda, kómirdiń shań tárizdi fraksıasyn keshendi paıdalaný, quramynda kúkirtsýtegi bar gazdardy tazartý, muzǵa qarsy zattarǵa arnalǵan natrıı formatyn alý, mal sharýashylyǵy qaldyqtarynan keratın gıdrolızattaryn óndirý jáne ózge de ınovasıalyq jobalar bar