2024 jyldyń 4 qarashasynda Almaty qalasynda Almaty sán jáne qyzmet kórsetý salasy kolejinde «Halyqaralyq taǵylymdama qorytyndysy boıynsha jobalardy iske asyrý» taqyrybynda qalalyq semınar ótti. Bul is-shara Almaty qalasynyń Bilim basqarmasy QBBJTǴÁO TjKBB bóliminiń josparyna sáıkes uıymdastyryldy. Semınardyń negizgi maqsaty – halyqaralyq taǵylymdama sheńberinde «Tigin óndirisi jáne kıimdi úlgileý», «Shashtaraz óneri», «Tamaqtanýdy uıymdastyrý» baǵyttary boıynsha júrgizilgen biliktilikti arttyrý jobalarynyń nátıjelerin talqylaý jáne olardy iske asyrý joldaryn kórsetý.
Semınar barysynda úsh negizgi baǵyt boıynsha jobalar usynyldy:
-
«Tigin óndirisi jáne kıimdi úlgileý» baǵyty boıynsha «Korset buıymdarynyń qurylysy jáne tehnologıasy» taqyrybynda joba tanystyryldy. Jobanyń aıasynda «Kıim konstrýktory» bilim berý baǵdarlamasy ózektendirilip, oqý jumys baǵdarlamalary ázirlendi. Oqý quraly ıtalán tilinen aýdarylyp, korset buıymdaryn jobalaý jáne daıyndaý boıynsha úıirmeler uıymdastyryldy, sonymen qatar áleýmettik seriktestiktermen yntymaqtastyq keńeıtý máseleleri qarastyryldy.
-
«Shashtaraz óneri» baǵyty boıynsha «Shashty uzartý túrleri» taqyrybynda joba usynyldy. Bul jobada shashty uzartý boıynsha kásibı standarttarǵa sáıkes bilim berý baǵdarlamalary ázirlenip, stýdentterge úıirmeler men sheberlik saǵattary uıymdastyryldy. Sonymen qatar, pedagogterdi oqytý jáne áleýmettik seriktestik bazasyn keńeıtý máseleleri qozǵaldy.
-
«Tamaqtandyrýdy uıymdastyrý» baǵyty boıynsha «Paıdaly tamaqtaný men mekteptegi tamaqtanýǵa qoıylatyn zamanaýı talaptar» taqyrybynda joba tanystyryldy. Bul jobada mektep jáne dıetalyq tamaqtaný, sondaı-aq túrli assortımenttegi shokolad ónimderi baǵyttary boıynsha bilim berý baǵdarlamalary ázirlendi. Stýdentterdi kásibı konkýrstarǵa daıyndaý jáne áleýmettik seriktestermen yntymaqtastyq ornatý jumystary júrgizilýde.
Semınardyń qorytyndysy boıynsha, halyqaralyq tájirıbelerdi engizý arqyly bilim berý sapasyn arttyrý jáne stýdentterdi zamanaýı kásiptik standarttarǵa sáıkes daıarlaý baǵytynda jumystardy odan ári damytý qajettiligi atap ótildi.
