Almatyda «Sentrl Eıja Feshn» halyqaralyq sán kórmesi ashyldy.
Onda Moskoý Eksport Sentr damý ınstıtýtynyń qoldaýymen máskeýlik 15 kompanıa sán úlgisin kórsetti. Jeńil ónerkásip salasynda jumys iseıtin bul kompanıalar Qazaqstanda óz kásibin damytqysy keledi, dep habarlaıdy almaty-akshamy.kz.
Atakent kórme pavılonynda adam kóp. Turǵyndardy Máskeýde jasalǵan brendtik taýarlar qyzyqtyrady. Ádemi kóılekter podıýmdaǵy arýlardyń ajaryn asha túskendeı. Kórmede san-alýan áshekeı buıym, bas kıimder men qoldorbalar áıelderdiń nazaryna usynyldy.
Vıktorıa Zvereva, máskeýlik eksport ortalyǵy bas dırektorynyń orynbasary:
«Biz úlken múmkindikti kórip otyrmyz. Qazaqstan biz úshin yntymaqtastyq pen kelisimge negizdelgen naryq. Biz naryqtaǵy kóptegen býtıkterdiń assortımentimen tanystyq. Kórme óte joǵary deńgeıde ótip jatyr. Halyq tarapynan, qyzyǵýshylyq bar. Astana men Almatyda ornalasqan býtıktermen kelissóz júrgizip jatyrmyz. Kórme bizdiń brendterdiń naryqqa shyǵýyna zor múmkindik beredi. Mysaly, Akhmadulina Dreams brendteri qazirdiń ózinde Qazaqstan naryǵynda suranysqa ıe. Sondyqtan bul shyn máninde tabysty shara dep oılaımyn».
Máskeýden Almatyǵa alǵash ret kelgen kásipkerler bar. Olar bizdiń naryqqa óz taýaryn usynyp, satýdy kózdeıdi.
Jamal Mahmýdov, kıim brendin jasaýshy:
«Meniń koleksıama qyzyǵýshyqtyń baryn baıqap, kádimgideı qýanyp qaldym. Kórmeden keıin kóremiz. Kóılekterim 24-35 jas aralyǵyndaǵy arýlarǵa arnalyp tigildi. Bar ónerimizdi saldyq. Arasynda qymbat úlgileri de, qoljetimdi túrleri de bar. Bul áıelderge arnalǵan brend. Ár koleksıany oılastyrǵanda aldymen áıeldiń ishki sezimin, symbatyn, ádemi kórinýin qalaımyn».
Kórme zalynda 7 brend óz ónimderin tanystyrady. Sán kórsetilimi 3 kún boıy ótedi. Sodan keıin uıymdastyrýshylar áriptestik baılanys ornatyp, iskerlik kelissóz bolady dep úmittenedi.