Quqyqtyq keńes berý – azamattardyń saýatyn arttyryp, memlekettik qyzmetterdi alý tártibin tereńirek túsinýge jol ashady. Osy maqsatta búgin, 30 mamyrda Almaty qalasynyń Ádilet departamenti ákimdikpen birlesip, «Halyq zańgeri» aksıasyn ótkizip jatyr, - dep habarlaıdy aqshamnews.kz tilshisi.
Bul aksıa – halyq pen memlekettik organdar arasyndaǵy baılanys pen senimdi nyǵaıtatyn tıimdi alań. İs-shara aıasynda tájirıbeli zańgerler men advokattar, Ádilet departamentiniń mamandary turǵyndardy tolǵandyrǵan saýaldarǵa jaýap berip, baǵyt-baǵdar kórsetedi.
Almaty qalasy Ádilet departamentiniń resmı ókili Shynar Maqsatqyzynyń aıtýynsha, bul aksıa elimizde jyl saıyn dástúrli túrde ótkizilip keledi. Al bıyl Almaty qalasynda uıymdastyrylǵan sharanyń aýqymy burynǵydan álde qaıda keńirek. Aksıa úsh birdeı joǵary oqý ornynda – Abaı atyndaǵy Qazaq ulttyq pedagogıkalyq ýnıversıtetinde, D.Qonaev atyndaǵy jáne Kaspıı ýnıversıtetterinde ótedi. Abaı ýnıversıtetinde tańǵy saǵat 10:00-den 13:00-ge deıin ótse, Qonaev jáne Kaspıı ýnıversıtetterinde keshki saǵat 17:00-de bastalady.
Abaı ýnıversıtetinde ótken is-sharaǵa Almaty qalasynyń prokýratýrasy, jeke sot oryndaýshylary, advokattar, Ádilet departamentiniń bas mamandary, mıgrasıalyq qyzmet, sondaı-aq qalalyq basqarmalar men aýdandyq ákimdikterdiń ókilderi qatysty. Barlyǵy 40-qa jýyq maman turǵyndarǵa tegin zańdy keńes berip, quqyqtyq kómek kórsetti.
«Túske deıingi ýaqyttyń ózinde 50-astam turǵyn ártúrli máseleler boıynsha zańgerlerden keńes aldy. Jıi qoıylǵan suraqtar – áleýmettik qamtamasyz etý, múgedektik alý tártibi, alıment óndirý, jeke sot oryndaýshylaryna qatysty, shottardyń buǵattalýyna baılanysty jáne jer qatynastary tóńireginde boldy», – dedi Shynar Maqsatqyzy.
Aksıa kezinde turǵyndarǵa quqyqtyq baǵyt-baǵdar berilip, ári qaraı máseleni sheshý úshin tıisti memlekettik organdarǵa nemese aýdandyq ákimdikterge júginý qajetigi túsindirildi.
Kelesi aksıalar ótetin eki ýnıversıtetke de mamandar jiberilip, turǵyndarǵa memlekettik qyzmettiń barlyq baǵyty boıynsha keńes beriledi. Buǵan deıin aksıa ótetini jóninde aqparattandyrý sharalary áleýmettik jeliler, memlekettik organdardyń resmı saıttary arqyly aldyn ala júrgizilgen bolatyn.
Aıta ketetin jaıt, «Halyq zańgeri» – el kóleminde ótip jatqan keń aýqymdy respýblıkalyq aksıa. Almaty qalasyndaǵy is-shara bir kúnge josparlanǵan.