«Halyq qatysatyn búdjettiń» maqsaty – qalalyqtardyń bastamalary men usynystary negizinde Almaty qalasy aýdandarynyń aýmaqtaryn damytý jáne abattandyrý.
Almatyda «Halyq qatysatyn búdjet» qalalyq jobasy aıasynda usynystardy qabyldaý bastaldy. Almatylyqtar 20 shildege deıin budget.open-almaty.kz portaly arqyly ótinim bere alady, dep habarlaıdy Almaty-akshamy.kz.
«Halyq qatysatyn búdjet» jobasynyń jalpy somasy 7,4 mlrd teńgeni quraıdy. Alty aýdanǵa - Almaly, Áýezov, Bostandyq, Jetisý, Medeý jáne Túrksib aýdandarynyń árqaısysyna 800 mln. teńgeden qarastyrylǵan. Qalaǵa qosylǵan aýmaqtardy damytý maqsatynda Naýryzbaı jáne Alataý aýdandarynyń árqaısysyna 1,3 mlrd.teńgeden.
Bólingen qala búdjetiniń qandaı bastamalarǵa bólinetinin Almaty turǵyndary ashyq daýys berý arqyly anyqtaıdy. Ideıa avtorlarynyń ótinimderine Almaty qalasy Qoǵamdyq keńesiniń músheleri, sarapshylar, máslıhat depýtattary, ÚEU ókilderi de óz baǵasyn beredi.
Jobalyq usynystar budget.open-almaty.kz portaly arqyly qabyldanady. Ol úshin ótinimdi toltyrý kerek (jobalyq usynystyń ataýy, onyń sıpattamasy, nysannyń meken-jaıy), jobalyq usynystyń nobaıy men smetasyn mindetti túrde qosa berý kerek (boljaldy bolýy múmkin). Bir jobanyń eń joǵarǵy quny 61,2 mıllıon teńgeden aspaýy kerek.
Jobalyq usynystar kelesi ólshemsharttarǵa sáıkes bolýy kerek:
- bir avtor – bir ótinim – bir nysan;
- qoljetimdilikti shekteýsiz jalpy paıdalaný nysany;
- nysan iske asyrylýy josparlanǵan aýdan aýmaǵynda, jalpyǵa qoljetimdi jerde ornalasýy kerek;
- ákimdiktiń quzyretinde bolýy tıis jáne t.b.
Kelesi jobalyq usynystar qabyldanbaıdy:
- qurylys-montajdaý jumystarynsyz tek jobalyq-smetalyq qujattardy ázirleýge arnalǵan;
- bolashaqta qosymsha elementterdi engizýdi talap etetin;
- Almaty qalasynyń damý baǵdarlamasyna, Qazaqstan Respýblıkasynyń zańnamasyna sáıkes kelmeıtin;
- komersıalyq sıpattaǵy jáne t.b.
Aýdan ákimdikteriniń saraptaý komısıalary jobalardy «Halyq qatysatyn búdjetti» uıymdastyrý jáne iske asyrý týraly erejeniń, Qazaqstan Respýblıkasy zańnamasynyń, Almaty qalasyn damytý baǵdarlamasynyń talaptaryna sáıkes irikteıtin bolady.
Aýdan ákimdiginiń saraptama komısıasynyń quramyn aýdan ákimi qalyptastyrady jáne bekitedi, onyń quramyna máslıhat depýtattary, aýdandyq sáýletshi, qurylys salasynyń mamany, qurylys obektileriniń smetalyq qujattamalaryn jasaý jónindegi maman, Almaty qalasynyń Qoǵamdyq keńesiniń, qoǵamdyq uıymdardyń ókilderi kiredi.
«Halyq qatysatyn búdjet» boıynsha keńesterdi nemese aqparatty Almaty qalasynyń aýdandyq ákimdikterinen, sondaı-aq Almaty qalasy ákimdiginiń «Open Almaty» qoǵamdyq qabyldaý bólmesinen 224 39 29 (ishki 203) telefony arqyly alýǵa bolady.