Qazaqstan Respýblıkasynyń Mádenıet jáne aqparat mınıstrliginiń qoldaýymen Jambyl atyndaǵy Qazaq memlekettik akademıalyq fılarmonıasy men B.Baıqadamov atyndaǵy memlekettik hor kapelasynyń 90 jyldyǵy aıasynda Qazaqstan Halqy Assambleıasynyń 30 jyldyǵyna arnalǵan «Gúl Almaty.
«Flower city» festıvaliniń-konserti ótti, dep habarlaıdy aqshamnews.kz.
Fılarmonıada bıyl dástúrli túrde tórtinshi jyl qatarynan ótkizilip otyrǵan festıváldiń maqsaty - elimizdegi balalar horyn damytyp, jas talanttardyń tanylýyna yqpal etý. Festıválde Qazaq Ulttyq Qyzdar Pedagogıkalyq ýnıversıtetiniń qyzdar hory arnaıy qonaq bolyp, konsertte óner kórsetti.
-Búgin fılarmonıamyzdyń úlken zalynda dástúrli túrde tórtinshi ret «Gúl Almaty» festıvaliniń konserti ótip jatyr. Festıválge qalamyzdaǵy eń úzdik, kásibı deńgeıleri bıik balalar hory ónerlerin kórsetti. Memlekettik hor kapelasy árqashan balalarǵa qoldaý berer festıváldi qýana-qýana ótkizemiz. Gúl Almatymyz órkendeı bersin, - deıdi Qazaqstannyń eńbek sińirgen qaıratkeri Beıimbet Demeýov.
Festıvál qatysýshylary «Qoӊyraý» kishi hory, «Kókek» balalar hory, «Aq tilek» uldar hory jáne taǵy da basqa balalar men jasóspirimderdiń oryndaýshylar toby iri ujym B.Baıqadamov atyndaǵy memlekettik hor kapelasymen bir sahnada óner kórsetti.
-Festıválge biz 2023-shi jyldan beri shaqyrtý alyp, balalar óz ónerlerin kórsetip keledi. Dástúrli túrde bolǵandyqtan, biz saǵyna, úlken daıyndyqpen kútemiz. Ózimniń jáne «Aq tilek» balalar hory atynan uıymdastyrýshylarǵa alǵys bildiremin. Jasóspirim talanttarǵa qoldaý berer «Gúl Almaty» festıvaliniń ǵumyry uzaq bolsa eken degen tilek bildiremin, - deıdi A.Jubanov atyndaǵy daryndy balalarǵa arnalǵan RQMMMI «Aq tilek» uldar horynyń jetekshisi Aınýra Ýalıhanqyzy.
Festıvál – tek konsert emes, bul – balalar men jasóspirimderdiń boıyndaǵy shyǵarmashylyqty oıatatyn, olardy sahna mádenıetine, ózara dostyq pen yntymaqqa baýlıtyn tárbıelik máni zor óner merekesi. Halyqtar dostyǵy, beıbitshilik pen birlik, daryndy jas urpaqtyń bolashaǵyna senim — merekelik keshtiń negizgi ıdeıasy boldy.
-Biz búgingi festıválde Mosarttyń, Abaı Qunanbaevtyń «Jelsiz túnde jaryq aı» shyǵarmasyn oryndaımyz. Festıválge bıyl da qatysatynymyzdy estigende qýanyp, qyzý daıyndyqpen keldik, - deıdi «Aq tilek» uldar horynyń oryndaýshysy Zıash Abdýllakbar.
Konserttik baǵdarlamada qazaq jáne álem klasıkteriniń týyndylary, zamanaýı avtorlyq kompozısıalar men túrli etnostardyń mýzykalyq murasy oryndaldy. Konsert sońynda festıválge qatysýshy barlyq ujymdarǵa uıymdastyrýshylar atynan alǵys hat pen arnaıy syılyqtar tabys etildi. Qara shańyraq qabyrǵasynda áli de jasóspirim talanttardyń óner jolyna qoldaý berer joba jalǵasyn tabatyn bolady.