Bul týraly Almaty ákimi Erbolat Dosaev Ortalyq komýnıkasıalar qyzmetinde ótken brıfıńte, qalada júrgizilip jatqan seısmoaýdıttiń nátıjeleri týraly suraqqa jaýap bere otyryp málimdedi, dep habarlaıdy aqshamnews.kz
«Halyqaralyq standarttarǵa saı ǵımarattar men qurylystardyń naqty seısmıkalyq turaqtylyǵyn anyqtaý maqsatynda qalada 21 441 nysandy qamtyǵan seısmoaýdıt, ıaǵnı nysandardy pasportızasıalaý júrgizildi», – dep atap ótti megapolıs basshysy.
Onyń aıtýynsha, 2017-2018 jyldary júrgizilgen seısmoaýdıttiń nátıjesinde 10 525 nysan zerttelse, 2023-2024 jyldary ekinshi kezeń aıasynda 10 916 nysan tekserilgen.
«Kelesi jyldyń basynda «QazNIISA» AQ atqarylǵan jumystardyń qorytyndysy boıynsha analıtıkalyq esep usynady. Osydan keıin turǵyn úı keshenderi men áleýmettik nysandardy seısmıkalyq kúsheıtý boıynsha alǵashqy kezektegi sharalar jospary qabyldanady. Jalpy, naqty málimetterge súıene otyryp jáne AQSH, Japonıa, Izraıl tájirıbesin eskere otyryp, biz ǵımarattardy seısmıkalyq kúsheıtý boıynsha qalalyq baǵdarlamany ázirleımiz jáne iske qosamyz», – dep atap ótti Erbolat Dosaev.
Sonymen qatar, qalada memlekettik áleýmettik ǵımarattardy seısmıkalyq kúsheıtý jumystary jyl saıyn júrgizilýde. 2025 jyly Bostandyq jáne Medeý aýdandaryndaǵy 3 mekteptiń seısmıkalyq kúsheıtý jumystary aıaqtalady, al Túrksib aýdanyndaǵy №50 mektep-lıseıdiń seısmıkalyq kúsheıtý jumystary bastalady. Sondaı-aq, Áýezov, Bostandyq jáne Medeý aýdandaryndaǵy 7 balabaqshada osyndaı jumystar júrgiziledi.