Qazaq, orys jáne nemis tilderinde óleń oqyldy.
«Seksen segizinshi kúz». Almatyda osyndaı ataýmen belgili qazaqstandyq prozashy, pýblısıs, aýdarmashy Gerold Belgerdiń ómiri men shyǵarmashylyǵyna arnalǵan eske alý keshi ótti, dep habarlaıdy Almaty-akshamy.kz Almaty.tv silteme jasap.
İs-sharany uıymdastyrýǵa respýblıkalyq Dostyq úıi jáne qaladaǵy nemis etno-mádenı qoǵamy muryndyq boldy. Eske alý keshinde jazýshynyń eńbekterinen kórme qoıylyp, qazaq, orys jáne nemis tilderinde óleń oqyldy.
«Bul keshti uıymdastyrýdyń basty maqsaty – ol kisiniń qazaq eline, qazaq ádebıetine, qazaq mádenıetine sińirgen eńbegin nasıhattaý. Ony biz belgili ádebıetshi, kórkem sózdiń sheberi, aýdarmashy, tildiń janashyry retinde bilemiz», – dedi Respýblıkalyq dostyq úıiniń qyzmetin qamtamasyz etý basqarmasynyń basshysy Nursaýle Áltekova.
Gerold Belgerdi eske alýǵa jaqyndary, dostary, shákirtteri, QHA músheleri, zıaly qaýym ókilderi men qoǵam qaıratkerleri qatysty. Kesh sońynda dóńgelek ústel uıymdastyrylyp, Gerold Belgerdiń ómirinen syr shertetin beınerolık kórsetildi.
«Gerold Belger – óte tamasha adam edi. Ol qazaq elin, qazaq tilin, mádenıeti men dástúrin bar jan-tánimen jaqsy kórdi. Sanaly ǵumyrynda tórt roman, eki poves jazyp qaldyrdy. Janyna jaqyn adamdardy erekshe qurmetteıtin. Jazýshysyn tóbesine kóterip, ár jyl saıyn jadynan shyǵarmaıtyn barsha qazaqstandyqtarǵa aıtar alǵysym sheksiz», – dedi G. Belgerdiń áıeli Raısa Hısmatýllına.