Kınoortalyq jańa jobalaryn tanystyrdy.
Kúni keshe Almatyda kınokontent óndirýshilerdiń, prodúserlerdiń, dıstrıbútorlyq kompanıalardyń, seıls-agentterdiń, kıno jelileriniń, strımıngtik platformalardyń, halyqaralyq kınofestıval baǵdarlamashylarynyń, Eýropa jáne TMD elderindegi kıno salasynda qyzmet kórsetetin kompanıalardyń qatysýymen Eurasian Film Market halyqaralyq kıno naryǵy bastaldy, dep habarlaıdy Almaty-akshamy.kz.
Ulttyq kınony qoldaý ortalyǵynyń habarlaýynsha, otandyq kıno salasynyń bas qarjy operatory bolyp tabylatyn Ulttyq kınony qoldaý memlekettik ortalyǵy kınonaryq qatysýshylaryna óz jobalaryn alǵash bolyp usyndy.
Alǵashqy bolyp sóz alǵan UKQMO basqarma tóraǵasy Qurmanbek Jumaǵalı Kınoortalyq 2019 jyly qurylǵan sátten bastap jalpy somasy 17 mlrd teńgege 100-den astam kınojobaǵa memleket tarapynan qoldaý kórsetilgenin aıta ketti. Olardyń ishinde 47 tolyqmetrajdy fılm, 25 derekti fılm, 24 qysqametrajdy fılm jáne 8 anımasıalyq fılm bar.
«Biz bul jumysty jalǵastyra otyryp, otandyq kınonaryqty qoldaýdyń jańa mehanımzderin engizýdi josparlap otyrmyz. Qazir bizde júzege asyrylýy kerek qysqa jáne uzaq merzimdi mindetter bar. Olar, eń aldymen, qoldanystaǵy «Kınematografıa týraly» Zańdy, erejeler men NQA-ny jetildirýge qatysty. Sondaı-aq, konkýrsqa qujattardy tapsyrý rásimin de sıfrlandyrý josparlanýda», - dedi Qurmanbek Jumaǵalı.
Odan keıin jınalǵan jurtqa UKQMO basqarma tóraǵasynyń orynbasary Baýyrjan Shókenov Kınoortalyqtyń prokatqa shyǵýǵa daıyn kınokartınalaryn usyndy. Olardyń ishinde qazan aıynda Ispanıadaǵy bedeldi kınofestıvalde kórsetiletin Asqat Kýchınchırekovtyń «Baýyryna salý», Sanjar Mádı, Dáýren Serǵazın, Asylhan Tólepov, Gúlnaz Jolanova syndy tamasha akterlik qurammen erekshelenetin Danıar Ibragımovtyń «Búrkit» ekshn-fılmi bar.
Sondaı-aq, áıgili Ádilhan Erjanovtyń «Múıiztumsyq» atty jańa jumysy jáne Farhat Sháripovtyń «A-Stýdıo» ánderine negizdelgen aýqymdy «Mahabbat soldaty» múzıkli tanystyryldy. Bul jobaǵa Baıǵalı Serkebaevtyń ózi prodúser-keńesshi retinde tartylǵan. Sonymen birge Maksım Akbarov prodúserlik etetin «Jaza» atty sybaılas jemqorlyq týraly ekshn-dramasy jáne qazaq repiniń paıda bolýy týraly Aıtore Joldasqalıdiń debúttik «Shýlama» jumysy kórermenderdiń erekshe qyzyǵýshylyǵyn týdyrdy.
Sonymen qatar, Kınoortalyq jeke blokta 2022-2023 jyly memleket qoldaýymen túsirilgen fılmderdiń treılerlerin tanystyrdy.
Eurasian Film Market – bul kınoındýstrıanyń zamanaýı qajettilikterine jaýap beretin, óńirlik yntymaqtastyqtyń shekarasyn keńeıtetin jáne jergilikti, alys-jaqyn sheteldiń kınoındýstrıasynyń bıznes-baılanystaryn qalyptastyratyn jyl saıynǵy forým. Shara aıasynda kınoındýstrıanyń ózekti máselelerine, sonyń ishinde kontentti dıstrıbýsıalaý, kórsetilim tehnologıalary jáne kıno salasyndaǵy halyqaralyq yntymaqtastyq týraly paneldik pikirtalastarǵa arnalǵan birqatar is-sharalar josparlanǵan. Forým tórt kúnge sozylady.