Almatyda "Qaýipsiz jol" respýblıkalyq jedel-profılaktıkalyq is-sharasy barysynda polıseıler jol qozǵalysy erejesin óreskel buzǵan moped júrgizýshisin toqtatty.
Er adam tártip saqshylarynyń zańdy talabyn oryndaýdan bas tartyp, qashýǵa árekettengenimen, kóp uzamaı ustaldy, - dep habarlaıdy Aqshamnews.kz.
Medısınalyq kýálandyrý nátıjesinde onyń esirtkilik mas kúıde bolǵany anyqtaldy. Jınalǵan materıaldar sotqa joldanyp, quqyq buzýshy kólik júrgizý quqyǵynan aıyrylyp, ákimshilik qamaýǵa alynatyn bolady. Al moped aıypturaǵyna qoıyldy.
– Mundaı jaǵdaılarǵa jol berýge bolmaıdy. Árbir júrgizýshi joldaǵy qaýipsizdik úshin óz jaýapkershiligin sezinýi tıis. Mas kúıde kólik basqarý – adamdardyń ómiri men densaýlyǵyna tikeleı qaýip tóndiredi. Almaty polısıasy mundaı quqyq buzýshylyqtarǵa qatań shara qoldanady. "Zań men tártip" qaǵıdaty bizdiń jumysymyzdyń negizgi ustanymy bolyp qala beredi, – dedi Naýryzbaı aýdandyq polısıa basqarmasynyń bastyǵy Dıdar Jaqypbaev.