Aýyl sharýashylyǵy mınıstrligi Memleket basshysynyń tapsyrmalaryn júıeli túrde oryndaýdy jalǵastyrýda.
Atap aıtqanda, tıimsiz paıdalanylyp kelgen jerlerdi memleket menshigine qaıtarý, olardy adal jer paıdalanýshylarǵa qaıta bólý jáne aýyl sharýashylyǵy alqaptaryn basqarý úderisterin tolyq sıfrlandyrý máseleleri.
2022 jyldan bastap nysanaly maqsatta paıdalanylmaǵan nemese zań buzýshylyqpen berilgen 13,7 mln gektar (ga) aýyl sharýashylyǵy jerleri memleket menshigine qaıtaryldy, - dep habarlaıdy Aqshamnews.kz.
Onyń ishinde 6,2 mln ga jańadan tıimdi jer paıdalanýshylarǵa bólinip berilip, olar jer telimderin ıgerip, aýyl sharýashylyǵy aınalymyna qosa bastady.
Qalǵan 7,5 mln ga jerdi bólý jumystary daıyndyq kezeńinde. Bul rette jergilikti qaýymdastyqtardyń, sharýalardyń jáne ınvestorlardyń qajettilikterine basa kóńil bólingen.
Aǵymdaǵy jyl bastalǵannan beri Aýylsharýashylyǵy mınıstrligi Jer resýrstaryn basqarý komıtetiniń aýmaqtyq bólimsheleri 2,1 mln ga aýmaqta jospardan tys 1 497 tekserý júrgizdi.
Nátıjesinde 1,6 mln ga jer boıynsha 1 112 nusqama berildi, 357,9 myń ga jer ıgerilýde, al 44,9 myń ga jerdi májbúrlep qaıtarý isteri sotta qaralýda.
2025 jyly qaıtarylýy tıis 2 mln ga jerdiń 1,67 mln gektary qazirdiń ózinde memleket menshigine qaıtaryldy.
Prezıdenttiń tapsyrmasyna sáıkes, kelesi jyldyń ortasyna deıin barlyq qaıtarylǵan aýyl sharýashylyǵy jerleri óndiriske engizilip, ınvestısıalyq aınalymǵa tartylyp, jańa jumys oryndaryn qurýǵa paıdalanylýy tıis. Bul jergilikti halyqtyń jaıylym tapshylyǵyn azaıtýǵa da yqpal etedi.
Bul oraıda Mınıstrlik jerdi qaıta bólý josparyn ázirlep, óńirlerge joldady. Onyń basty basymdyǵy – aýyl turǵyndarynyń jaıylymdyq jerge degen suranysyn qanaǵattandyrý.
Jer saıasatynyń basym baǵyttarynyń biri – aýyl sharýashylyǵy jerlerin berý, monıtorıń júrgizý jáne paıdalanýdy baqylaýdyń barlyq kezeńderin sıfrlyq formatqa kóshirý.
Osyǵan baılanysty Jer kodeksine aýyl sharýashylyǵy jerlerin tek elektrondy formatta berýdi qarastyratyn ózgerister engizý bastamasy kóterildi.
Basym baǵyttardyń qatarynda, jeńimpazdy anyqtaý prosesinen jer komısıasyn alyp tastaý, adamı faktordy joıý, avtomatty túrde bal esepteletin ashyq konkýrs mehanızmin engizý, konkýrstardy ótkizý merzimin eki esege qysqartý sıaqty ózgeristerdi atap ótýge bolady.
Sonymen qatar «Memlekettik jer kadastry derekterin qalyptastyrý» baǵdarlamasy aıasynda aýyl sharýashylyǵy jerleriniń biryńǵaı ashyq sıfrlyq kartasyn jasaý jumystary júrgizilýde.
Búgingi kúni 197,937 mln ga jer ýchaskesi sıfrlandyrylyp, ashyq túrde qoljetimdi etildi. Jobany aıaqtaý osy jyldyń sońyna josparlanǵan.
Nátıjesinde jer paıdalanýshylar jer ýchaskeleriniń mártebesi, ıesi, nysanaly maqsaty jáne paıdalaný tarıhy týraly tolyq aqparatqa onlaın rejımde erkin qol jetkize alady.
Atqarylyp jatqan sharalar – Prezıdenttiń Qazaqstan Halqyna Joldaýynda júktelgen mindetterdi oryndaýǵa baǵyttalǵan mejeli jumystardyń bir bóligi. Naqtylap aıtqanda, bul – jasandy ıntellekt qoldaný arqyly spýtnıktik monıtorıń tıimdiligin arttyrý, jer resýrstaryn ádil bólý, jerdi maqsatty paıdalanýshylardy qoldaý jáne ınvestısıa tartýǵa qolaıly jaǵdaı jasaý.