Qylmystyq áreketti 33 jastaǵy S. esimdi azamat jasaǵan.
Onyń Mercedes avtokóligin polısıa qyzmetkerleri Dostyq dańǵyly men Omarova kóshesiniń qıylysynda toqtatty. S. esimdi azamatty jeke tintý jáne avtokólikti tintý kezinde ishinde zaty bar ızolentaǵa oralǵan 85 býma tabyldy jáne tárkilendi, dep habarlaıdy Almaty-akshamy.kz Polisia.kz-ke silteme jasap.
Ustalǵan azamat olardy Almaty qalasy men Almaty oblysyna odan ári taratý úshin saqtap qoıǵan. Tárkilengen zattar – mefedron jáne marıhýana esirtkisi.
Anyqtalǵandaı, kúdikti sıntetıkalyq shópti ózi jasaǵan. Osy maqsatta ol Almaty oblysy Tuzdybastaý aýylynda jeke turǵyn úıdi jalǵa alǵan.
Ruqsat etilgen tintý kezinde jalǵa alynǵan turǵyn úıden zerthanalyq jabdyqtar, shyny tostaǵandar men krıstaldy zattar salynǵan metal qańyltyrlar, kanıstrdegi ártúrli suıyq jáne untaq hımıalyq zattar, untaq zattar salynǵan polıetılen baılamdar, elektrondy tarazylar, magnıttik aralastyrǵysh jáne 300 qapshyq tabyldy jáne tárkilendi. Saraptama qorytyndysyna sáıkes, tárkilengen mefedronnyń jalpy salmaǵy 15 keli 200 gramdy qurady. Jaýap alý kezinde “óndirýshi” laborant pen kýrer jumysy úshin jaqsy jalaqy alǵanyn aıtty. Jumys berýshi zerthana úshin baspanany da jalǵa alyp bergen. Atalǵan derek boıynsha Medeý aýdandyq polısıa basqarmasy sotqa deıingi tergeý amaldaryn júrgizip jatyr. Qylmystyq is QR QK-niń 297-baby 3-bóligi boıynsha tirkeldi. Kúdikti qamaýǵa alyndy.