Almatynyń Túrksib aýdanynda polısıa qyzmetkerleri arnaıy is-sharany júrgizdi.
Polısıa departamentiniń aqparaty boıynsha, kúdikti buǵan deıin de esirtki qylmysy úshin isti bolǵan, dep habarlaıdy Almaty-akshamy.kz Polisia.kz-ke silteme jasap.
"Sh. esimdi azamat buǵan deıin, dálirek aıtsaq, 2008 jyly esirtki qylmysy úshin sotty boldy jáne jazasyn ótedi. Qaskóı qaıtadan eski isin qolǵa alyp, qylmystyq zańnamany buzdy. Qazir ol esirtkini onlaın satyp alýǵa bolatyn resýrstarǵa trafarettik jarnamalardy salatyn “sýretshi”. Kúdikti bir aptadan astam ýaqyt boıy tyıym salynǵan “shyǵarmashylyqpen” jumys istegenin moıyndady. Bul týraly bizde basqa da málimetter bar. Ustalǵan adamnyń aıtýynsha, ol buǵan deıin Áýezov, Alataý jáne Jetisý aýdandarynda ornalasqan ǵımarattarǵa jazý jazǵan. Oǵan jumys istegeni úshin elektrondy ámıan arqyly aqsha tólegen", – deıdi Almaty qalalyq PD Esirtki qylmysyna qarsy kúres basqarmasy bastyǵynyń orynbasary Saǵyndyq Aıaǵanov.
Sh. esimdi azamatty tekserý barysynda birneshe saıttardyń mekenjaılary jazylǵan trafaretter men boıaýlar tabyldy jáne tárkilendi. Onyń is-áreketi QR QK-niń 299-1 babymen saralandy. Esirtki quraldaryn, psıhotroptyq zattardy nemese olardyń analogtaryn, prekýrsorlaryn nasıhattaǵany nemese zańsyz jarnamalaǵany úshin úsh jylǵa deıingi merzimge bas bostandyǵynan aıyrýǵa jazalanady.