Atalmysh shara 24-30 maýsym aralyǵynda ótedi.
Qazaqstan Úkimeti bos jumys oryndarynyń alǵashqy onlaın-jármeńkesin ótkizýdi kózdep otyr. Bul týraly Úkimet otyrysynda Eńbek jáne halyqty áleýmettik qorǵaý mınıstri Tamara Dúısenova málimdedi, dep habarlaıdy Almaty-akshamy.kz QazAqparatqa silteme jasap.
Ol aldymen eńbek naryǵynda jumyspen qamtý máselesi qalaı sheshilip jatqanyn túsindirdi.
«Birinshi kezektegi másele - jastardy jumysqa tartý. Ol úshin orta jáne iri kásiporyndardaǵy bos jumys oryndaryna onlaın-jármeńke ótkizý arqyly jastardy eńbekpen qamtý qolǵa aldyq. Bıyl mamyr aıynda ERG kompanıalar tobymen birlesip, bilim berý uıymdarynyń túlekterin jáne 35-ke deıingi jastardy jumysqa ornalastyrýdyń onlaın-jármeńkesi pılottyq rejımde ótkizildi. Kompanıa 350 jumys ornyn usyndy. Bir aptanyń ishinde jumys berýshiniń talaptaryna sáıkes keletin 159 jas irikteýden ótip, jumysqa qabyldandy. Olardyń arasynda elimizdiń barlyq óńiriniń ókilderi bar», - dedi mınıstr.
Eńbekmıni pılottyq jobanyń qorytyndysyn Bilim jáne ǵylym, Ulttyq ekonomıka, Sıfrlyq damý mınıstrlikterimen jan-jaqty zerdelegen. Talqylaýǵa taý-ken, metalýrgıa salasyndaǵy kásiporyndardyń jáne «Samuryq-Qazyna» aksıonerlik qoǵamynyń ókilderi de belsene qatysty.
«Sonyń nátıjesinde bul kompanıalarmen osy jyldyń sońyna deıin elektrondy eńbek bırjasyna 20 myń bos jumys ornyn ornalastyrý týraly kelisimge keldik. Onyń ishinde IT salasy men «Aýyl - el besigi» jobasy da bar», - deıdi Dúısenova Úkimet otyrysynda.
Bos jumys oryndardyń alǵashqy onlaın-jármeńkesi 24-30 maýsym aralyǵynda ótedi.
«Keleshekte aı saıyn turaqty uıymdastyrý kózdelip otyrǵan jármeńke tek kásiporyn ornalasqan aımaq turǵyndaryna ǵana emes, barlyq qazaqstandyqtarǵa birdeı qoljetimdi bolýyn, jumysqa qabyldaý prosesiniń ashyqtyǵyn, jumys izdeýshiniń maqsatty tańdaýyn, jumys berýshilerdiń sapaly irikteý múmkindigi bolýyn qamtamasyz etedi», - dep túsindirdi ol.