Almatyda Esirtki quraldarynyń, psıhotroptyq zattardyń jáne olardyń prekýrsorlarynyń zańsyz aınalymyna qarsy kúres jónindegi Ortalyq Azıa óńirlik aqparattyq úılestirý ortalyǵynda 2023-2025 jyldarǵa arnalǵan esirtki jáne esirtkimen kúres jónindegi keshendi jospar jobasy tanystyryldy.
İs-sharaǵa memleketterdiń quzyretti organdarynyń basshylary men sarapshylary jáne OAÓAÚK baqylaýshylary, halyqaralyq uıymdardyń ókilderi qatysty, dep habarlaıdy Almaty-akshamy.kz QazAqparatqa silteme jasap.
«Esirtkilerdiń, ásirese, olardyń sıntetıkalyq túrleriniń taralý problemasy búkil álemdik qoǵamdastyq úshin jahandyq qaýip tóndiredi. Esirtkiniń zańsyz aınalymymen kúres – asa ózekti jáne strategıalyq mindet»,- dedi QR İİM Esirtki qylmysyna qarsy kúres departamentiniń basshysy, polısıa polkovnıgi Qajyǵalı Imajanov.
Sonymen qatar, ol tanystyrylym barysynda negizgi baǵyttardy atap ótti.
«Birinshiden, nashaqorlyqtyń aldyn alý, emdeý, nashaqorlardy esepke alý, ońaltý jáne qaıta áleýmettendirý júıesin damytý. Taǵy bir mindet – elektrondy tólem júıeleri, drop kartalary, krıptovalútalar jáne basqa da qarjy quraldary arqyly zańsyz esirtki aınalymyn toqtatý. Sondaı-aq, Qazaqstandaǵy eń tanymal ınternet-platformalardyń ókildikteriniń keńeıýi ınternet-resýrstardy esirtkiniń zańsyz aınalymyna paıdalanýdy shekteıdi. Jospardyń bir baǵyty – sot-saraptama qyzmetin, sıntetıkalyq esirtki jáne olardyń prekýrsorlaryn zertteý ádisterin jetildirý»,- dedi ol.
Spıkerdiń sózinshe, usynylǵan josparda zıandy zat «sıntetıka» jáne kúshti áser etetin basqa da zattardyń zańsyz aınalymy úshin jaýapkershilikti kúsheıtý qarastyrylǵan.
Memlekettik esirtki saıasatyn qalyptastyrý men júzege asyrýda İİM-niń úılestirýshi rólin kúsheıtý - osy jospardyń bir tarmaǵy.
«Esirtki bıznesi salasyndaǵy halyqaralyq yntymaqtastyqtyń keńeıýi barlyq derlik sheteldiktermen jáne halyqaralyq uıymdarmen kóp vektorly ózara árekettesýge áser etedi»,- dedi ol.
Eske salaıyq, Memleket basshysy Qazaqstan halqyna jyl saıynǵy Joldaýynda esirtki máselesin sheshýge jalpyulttyq sıpat bere otyryp, keshendi jospar ázirleýdi tapsyrǵan bolatyn.