Erkin Raqyshevtyń taǵy bir týyndysy jaryq kórdi.
Jańa fılmdi túsirýge 30 myń AQSH dollary jumsaldy.
«Sezar» kınoteatrynda rejıser Erkin Raqyshevtyń «Baqytyńdy aıala» fılminiń tusaýkeseri ótti, dep habarlaıdy Almaty-akshamy.kz.
Fılm meıirimdilik pen qaıyrymdylyqty, adamgershilikti nasıhattaıdy.
«Bul fılmdi túsirýge 30 myń AQSH dollaryn jumsadyq. Bir-birine jany ashymaıtyn zamanda osyndaı fılmder bolýy qajet. Sonda qoǵamda janashyr adamdar kóbeıedi. Meniń osy ýaqytqa deıin túsirgen fılmderimniń barlyǵy qoǵamdaǵy jaıttardy aıqyndaıdy. Akterlarymyzda kásibı mamandar emes, ózim laıyqty dep tapqandar. Qarajat jaǵynan kóptegen qıyndyqtar kórdik. Eshqandaı memlekettiń ne bolmasa jeke tulǵalardy qarajatyna túsirilmedi. Adamdardyń júregine jylý syılaıtyn fılmdi elimizdiń barlyq kınoteatrlarynan tamashalaı alasyzdar», – deıdi rejıser Erkin Raqyshev.
Fılmde qurylysta istep júrgen jumysshylar arasynda «Daǵdarystan qalaı shyǵamyz, qymbatshylyq pen kedeıshilikten qalaı qutylamyz?» degen pikirtalas bolady. Sol kezde bir kisi ál-Farabı babamyzdyń "memlekettiń damyp, órkendeýi úshin, halyq aldymen meıirimdi, qaıyrymdy bolyp ósýi kerek" degenin aıtady. Muny estigen Qýat Kovıd aýrýhanasyna erikti bolyp jumysqa kiredi. Birde "jedel járdem" aýrýhanaǵa dem ala almaı jatqan aýyr naýqas qyzdy alyp keledi. Tynys alý apparaty istemeı qalyp, Qýat óziniń ómirin qaýipke tigip, jasandy dem berý arqyly qyzdy aman alyp qalady. Arada biraz ýaqyt ótkende, ekeýi kezdeısoq kezdesip qalyp, bir-birine ǵashyq bolady. Qýat qyzdy tanyǵanmen, ony Arýjanǵa aıtpaıdy. Arýjan ózin qutqarǵan jigittiń Qýat ekenin bilmeıdi.
«Fılmde men meıirimdi, jaqsylyqqa jany qushtar jastyń biri bolamyn. Bul fılmde oılanar dúnıeler óte kóp. Kórkem týyndy bir jyldyń ishinde túsiririldi. Este qalar erekshe sátter óte kóp. Almaty qalasynyń áń sándi ári kórikti jerlerinde túsirdik. Maǵan barlyǵy unady. Akterlarmen dos bolyp kettik. Barlyǵyna rahmetimdi aıtamyn», – deıdi fılmniń basty keıipkeri Abaı Májıtov.