Almatyda ótip jatqan álem chempıonatynda búgin blıs shahmattan jarys bastaldy. Keshe jyldam shahmat jarysy aıaqtalǵan bolatyn.
Úsh kúnge sozylǵan jyldam shahmattyń nátıjesi boıynsha jeńimpazdar keshe anyqtalǵan. Rapıdten erler arasynda jarys favorıti norvegıalyq Magnýs Karlsen jeńiske jetip, tórtinshi ret chempıon boldy. Ol buǵan deıin 2014, 2015, 2019 jyldary jyldam shahmattan álem chempıony atanǵan.
«Meni toqtatatyn adam shyqqan kezde ǵana men mansabymdy aıaqtaımyn. Jalpy týrnır deńgeıi óte joǵary. Jeńiske jetý ońaı bolǵan joq», – dep óz jeńisinen keıin Magnýs Karlsen pikir bildirdi.
Aıtylǵan jarys túrinen 2-oryn 18 jastaǵy nemis grosmeısteri Vınsent Keımerge buıyrdy. Al 3-orynǵa amerıkalyq shahmatshy Fabıano Karýana jaıǵasty.
Al áıelder arasyndaǵy jyldam shahmatta otandasymyz Dınara Sádýaqasova sheber óner kórsetip, álem chempıonatynyń kúmis júldesine ıe boldy. QR Shahmat federasıasynyń atqarýshy dırektory Gúlmıra Dáýletovanyń aıtýynsha, bul - elimiz úshin óte jaqsy nátıje.
- Bárimiz qýanyshtymyz. Sebebi Qazaqstan namysyn qorǵaǵan Dınara Sádýaqasova jarysta ekinshi oryn aldy. Bul - memleketimiz úshin úlken jetistik. Dınara birinshi oıyn kúni tórt ret teń nátıje kórsetti. Biraq odan keıingi oıyndarda birqatar jeńisterge jetip, nátıjesinde qytaılyq Tan Chjýnımen upaıy teń tústi. Jarys erejesi boıynsha ondaı kezde shahmatshylar taı-breık oınaıdy. Ókinishke oraı, qytaılyq qyz basym tústi. Degenmen, bul Dınara úshin jaqsy nátıje, ol buǵan deıin mundaı júldeli orynǵa ıe bolmaǵan edi. Sondaı-aq, rapıd jarysyn Jansaıa Ábdimálik 5-orynda aıaqtady, – dedi G.Dáýletova.
QR Shahmat federasıasynyń atqarýshy dırektory búgin bastalǵan blıs shahmatta da otandyq sportshylardan júldeli oryndar kútetin jasyrǵan joq.
- Rapıd jarysynda qazaqstandyq er shahmatshylardan Qazybek Nógerbek eń joǵary nátıjeni kórsetti. Ol jarysty 38-orynda aıaqtady. 18 jastaǵy shahmatshymyz óte jaqsy oınady. Jaqynda ǵana ol 18 jasqa deıingi jas sanatynda álem chempıony atanǵan. Osy joly eresek arasyndaǵy jarys ekenine qaramaı, ózin jaqsy kórsete bildi. Al búgingi bastalǵan blıs týraly aıtsaq, árıne, shahmatshylarymyzdan jeńis kútemiz. Bizdiń qyzdar blısti óte jaqsy oınaıdy. Al erler arasyndaǵy blıstan qarasha aıynda Rınat Jumabaev Azıa chempıony boldy. Sondyqtan úmitimiz úlken, – dep atap ótti Gúlmıra Dáýletova.
Búgin blıs shahmattyń ashylýyna alǵashqy sımvoldyq qadamdy jasaǵan Keńes Raqyshev Almatyda ótip jatqan týrnırdiń paıdasy kóp ekenin aıtady.
- Men úshin blısten jarystyń ashylýynda bolý úlken mártebe. Ótken jyly men Shahmat federasıasynyń Qamqorshylyq keńesine shaqyrtý aldym. Al bıyl Almaty qalasynyń Qamqorshylyq keńesine shaqyryldym. Men shyn júrekten bizdiń federasıaǵa kómektesýge daıynmyn. Qazaqstanda shahmattyń myqty mektebi qalyptasqan, biz ony ári qaraı damytqymyz keledi. Meniń alty jastaǵy qyzym da shahmat oınaıdy, ol qazirgi kúni shahmattan Almaty qalasynyń chempıony, – dedi K.Raqyshev.
Jarystyń eki týry ótken soń, shahmattan Qazaqstan quramasynyń múshesi – 22 jastaǵy Álisher Súleımenovpen tildesýdiń sáti tústi. Ol blıs shahmattyń alǵashqy oıyndarynan alǵan áserimen bólisti.
- Alǵashqy oıyndar men úshin sátsiz boldy. Biraq ári qaraı jaqsy óner kórsetýge talpynamyn. Keshe aıaqtalǵan rapıd jarysy men úshin jaqsy ótti. Jalpy úzdik júzdiktiń ishine kirip, 92-orynda aıaqtadym. Bul jarys men úshin alǵashqy blıs jáne rapıd boıynsha álem chempıonaty. Munda otandyq jankúıerlerdiń qoldaýy seziledi, – dedi ol.
Alǵashqy oıyndar ótken kezde BAQ ókilderine arnalǵan alańda kógildir ekranǵa telmirip, óz shákirti úshin taqymyn qysyp otyrǵan polshalyq jattyqtyrýshy Kamıl Mıtondy kózimiz shaldy. Sheteldik mamannan elimizdegi jarystan qandaı áser alǵanyn suradyq.
- Men birinshi ret Qazaqstanǵa kelip otyrmyn. Almatynyń kórikti jerlerin aralaýǵa áli ýaqytymyz bolǵan joq. Kúndelikti jarys ótip jatyr. Biraq jergilikti adamdar unady, bári qonaqjaı, jyly lebiz tanytady. Uıymdastyrý deńgeıi de óte jaqsy. Jarys týraly aıtsaq, qazaqstandyq qyzdar óte jaqsy óner kórsetýde. Sondaı-aq, 8-10 jastaǵy kishkentaı qyzdar qatysyp jatqanyn baıqadym. Bul olar úshin óte úlken tájirıbe. Men Ian Kshıshtof Dýdanyń jattyqtyrýshysymyn. Osy týrnırge asa muqıattylyqpen daıyndaldyq. Tek moraldyq turǵyda emes, fızıkalyq jattyǵýlar da jasadyq. Sebebi mundaı jarystar adamdy sharshatady, – dedi Polshadan kelgen maman.